Nusrat Jahan Rafi : ලිංගික අඩන්තේට්ටම් පැමිණිල්ලක් කළ සිසුවියක ගිනි තබා මැරූ 16 දෙනාට මරණ දඩුවම

ගුරුවරයෙකු විසින් තමන්ව ලිංගික අපයෝජනයට ලක් කරනු ලැබූ බවට පැමිණිලි කළ බංග්ලාදේශ සිසුවියක ගිනි තබා ඝාතනය කිරීම සම්බන්ධයෙන් පුද්ගලයින් 16 දෙනෙකුට මරණ දඬුවම නියම කෙරිණි.

චූදිතයින් බන්ධනාගාරය වෙත රැගෙන යමින්

නුස්රත් ජහාන් රාෆි Nusrat Jahan Rafi නමැති 19 හැවිරිදි එම සිසුවිය බංග්ලාදේශයේ ධකා අගනුවර සිට කිලෝමීටර් 160ක් පමණ දුරින් පිහිටි ෆෙනී නමැති ප්‍රදේශයකදී ඝාතනයට ලක්වූයේ, මේ වසරේ අප්‍රේල් මාසයේදීය.

ලිංගික අපයෝජනය සිදුකළ බවට චෝදනා ලැබූ පාසලේ ප්‍රධාන ගුරුවරයා සහ ඇය ඉගෙනුම ලැබූ පන්තියේ ඉගෙන ගන්නා සිසුවියන් දෙදෙනෙක් ද වරදකරුවන් අතර වූහ.

ඇයගේ ඝාතනයෙන් බංග්ලාදේශය සලිත වී ගිය අතර නුස්රත්ට සාධාරණය ඉටු කරන ලෙස ඉල්ලා විරෝධතා මාලාවක් ද ක්‍රියාත්මක විය.

නුස්රත්ට සාධාරණය ඉටු කරන ලෙස ඉල්ලා විරෝධතා මාලාවක් ක්‍රියාත්මක විය.

සාමාන්‍යයෙන් බංග්ලාදේශ අධිකරණ පද්ධතියේ මෙවැනි නඩු විභාග සදහා වසර ගණනක් ගත වන අතර මෙය ඉතා කඩිනමින් අවසන් වූ නඩු විභාගයක් විය. නීතිඥ හෆීස් අහමඩ් මාධ්‍යවේදීන් හමුවේ පැවසුවේ, “බංග්ලාදේශය තුළ ඝාතනයක් සිදු කර ඉන් ගැලවීමට කිසිවෙකුට නොහැකි” බව මෙම නඩු තීන්දුවෙන් තහවුරු වූ බවය.

මේ අතර, විත්තිකාර පාර්ශවයේ නීතිඥයින් පවසන්නේ, මෙම තීන්දුවට එරෙහිව අභියාචනයක් ඉදිරිපත් කරන බවය.

නුස්රත්ගේ මරණය පිළිබඳ පරීක්ෂණයෙන් අනාවරණය වූයේ, ඇගේ ම පන්තියේ මිතුරන් සහ තවත් ප්‍රබල පුද්ගලයින් පිරිසක් ඇය නිහඬ කිරීමේ කුමන්ත්‍රණයක නිරත වූ බවය.

අදාළ සිසුවිය අපයෝජනයට ලක් කිරීමේ චෝදනාවට සැකපිට අත්අඩංගුවට ගෙන බන්ධනාගාරගත වී සිටියදී ඇය ඝාතනය කිරීමට නියෝග කළ බව බව කියන ෂිරාජ් දොවුලා නමැති පාසලේ ප්‍රධාන ගුරුවරයා ඇතුළු ගුරුවරුන් තිදෙනෙක් අධිකරණය විසින් බ්‍රහස්පතින්දා වරදකරුවන් බවට පත් කරනු ලැබූහ. මරණ දඩුවම ලැබූ තවත් දෙදෙනෙකු වූ රුහුල් අමීන් සහ මක්සුඩ් අලාම් මේ වන විට බලයේ සිටින අවාමි ලීගයේ ප්‍රාදේශීය නායකයින් දෙදෙනෙකි.

නුස්රත් රාෆි

නුස්රත් සියදිවි හානි කර ගත් බවට සාවද්‍ය තොරතුරු පතුරුවා හැරීම සඳහා, මරණ දඬුවම පැනවුණු පුද්ගලයින් සමග ෆෙනී ප්‍රදේශයේ පොලිස් නිලධාරීන් සම්බන්ධවී ඇතැයි ද හෙළිවිණි. ඔවුන් නුස්රත්ගේ ඝාතනයට අදාළ නඩු විභාගයට ඇතුළත් නොවීය.

බංග්ලාදේශ මාධ්‍ය වාර්තා කළේ, මාර්තු මාසයේදී අදාළ වරදකරුවන් පිළිබදව පැමිණිලි කිරීම සදහා පොලිසියට යාමට නුස්රත්ට සහය වූ ඇයගේ පවුලේ සාමාජිකයින් පොලිස් ආරක්ෂාව යටතේ පසුවන බවය.

ඔවුහු වරදකරුවන්ට එරෙහිව දුන් තීන්දුව පිළිබදව සතුට පළ කළහ. ඔවුන් පැවසුවේ, එම දඩුවම කඩිනමින් ක්‍රියාත්මක කළ යුතු බවය. බංග්ලාදේශ් හි මරණ දඬුවම ක්‍රියාත්මක කෙරෙනුයේ එල්ලා මැරීමෙනි.

නුස්රත් ජහාන් රාෆි

බංගලාදේශ පාසලක ඉගෙනුම ලබමින් සිටි නුස්රත් ජහාන් රාෆි නම් සිසුවියට පාසල තුළදී ම භූමිතෙල් දමා ගිනි තබා ඝාතනය කර තිබේ.

ඉන් දෙසතියකට පෙර පාසලේ ප්‍රධාන ගුරුවරයා තමන් ලිංගික අපයෝජනයට ලක් කළ බවට ඇය පොලිසියේ පැමිණිල්ලක් ගොනු කර තිබිණි.

ලිංගික අඩන්තේට්ටම්වලට එරෙහිව ඇය හඬ නැගීම, දින පහකට පසු ඇයව ඝාතනය කිරීම සහ ඒ අතරතුර සිදු වූ සියලු සිද්ධි මූලික කරගෙන ගතානුගතික දකුණු ආසියානු රටක් වන බංගලාදේශයේ කාන්තාවන් මුහුණ පාන ලිංගික අඩන්තේට්ටම් පිළිබඳව ලෝකයේ අවධානය යොමු වෙමින් පවතී.

19 හැවිදිරි නුස්රත් ජීවත් වූයේ, ඩකා නුවරට දකුණු දෙසින් කිලෝමීටර් 160ක් එපිටින් පිහිටි ‘ෆෙනී’ නම් කුඩා නගරයේය.

ඇය ඉස්ලාමීය පාසලක ඉගෙනුම ලැබුවාය. පසුගිය මාර්තු 27 වන දා පාසලේ ප්‍රධාන ගුරුවරයා ඇය සිය කාර්යාලයට ගෙන්වාගෙන දිගින් දිගට ම අනවශ්‍ය ආකාරයට ස්පර්ශ කළ බව ඇය පවසා තිබිණි.

එය තවත් බරපතළ තත්ත්වයකට පත් වීමට පෙර ඇය කාර්යාලයෙන් ඉවතට දිව ගොස් තිබේ.

සමාජයෙන් සහ පවුලෙන් එල්ල වන පීඩනය හේතුවෙන් බංගලාදේශයේ බොහෝ කාන්තාවෝ තමන්ට සිදුවන ලිංගික අඩන්තේට්ටම් ගැන හෙළි නොකරති.

නමුත් නුස්රත් ජහාන් රාෆි තමන්ට සිදු වූ හිරිහැර ගැන හඬ නැඟුවා පමණක් නොව, සිය පවුලේ අයගේ සහය ඇතිව ඒ ගැන පොලිසියට පැමිණිල්ලක් ඉදිරිපත් කිරීමට ද ක්‍රියා කළාය.

ප්‍රදේශයේ පොලිස් ස්ථානයට ගිය ඈ ප්‍රකාශයක් ලබා දුන්නාය. ඇය මුහුණ පෑ කටුක අත්දැකීම් විස්තර කිරීමට පොලිසිය තුළ ආරක්‍ෂිත ස්ථානයක් ලබා දිය යුතුව තිබිණි. නමුත්, සිදු වූයේ වෙනත් දෙයකි. ඇය මුහුණ පෑ සිද්ධිය ගැන පවසද්දී අදාළ පොලිස් නිලධාරියා සිය ජංගම දුරකතනයෙන් එය වීඩියෝගත කර තිබිණි.

නුස්රත් එම අවස්ථාවේ මහත් අපහසුතාවට පත්ව සිය අත්ලෙන් මුහුණ සඟවා ගැනීමට උත්සහ කරන අයුරු වීඩියෝ දර්ශනවල පැහැදිලිව දැක ගත හැකිය.

මෙය “ඒ තරම් ලොකු දෙයක් නෙවෙයි” යැයි පවසන පොලිස් නිලධාරියා මුහුණෙන් අත් ඉවත් කර ගන්නා ලෙස ඉල්ලා සිටින ආකාරය මෙම වීඩියෝවේ දක්නට ලැබේ. පසුව මෙම වීඩියෝව මාධ්‍යයට ලබා දීමට ඔහු ක්‍රියා කර තිබිණි.

‘මම ඇයව පාසලට අරගෙන යන්න උත්සහ කළා’

Nusrat Jahan Rafi
නුස්රත්ගේ මරණයත් සමග ලිංගික හිංසනයන්ට මුහුණ දුන් කාන්තාවන්ට එල්ල වන හිරිහැරවලට එරෙහිව බංගලාදේශය පුරා උද්ඝෝෂණ පැවැත්වේ

කුඩා නගරයක, සාම්ප්‍රදායික පවුලකින් පැවත එන නුස්රත් ජහාන් රාෆි අධ්‍යාපනය හැදෑරුවේ ආගමික පාසලකය. එවන් පසුබිමක සිට ලිංගික අපයෝජනයක් ගැන පැමිණිල්ලක් ඉදිරිපත් කිරීම ඉතා අපහසු කාර්යයකි.

මෙවන් අවස්ථාවකදී අදාළ කාන්තාවට ඇය අවට සමාජයෙන් දැඩි පීඩනයක් එල්ල වන අතර, අන්තර්ජාලයෙන් මෙන් ම වෙනත් නොයෙකුත් පුද්ගලයන්ගෙන් ද හිරිහැර එල්ල වන අවස්ථා ඇත. සමහර අවස්ථාවල දී දරුණු ප්‍රහාරයන්ට ලක් වීමට ද ඉඩ ඇත.

නුස්රත්ට ද මේ සියල්ලට ම මුහුණ දීමට සිදු විය.

ඇය ඉදිරිපත් කළ පැමිණිල්ලට අනුව පොලිසිය ප්‍රධාන ගුරුවරයා අත්අඩංගුවට ගනු ලැබීය. ඉන්පසු නුස්රත්ට එල්ල වන පීඩනය දැඩි විය.

ප්‍රධාන ගුරුවරයා නිදහස් කරන ලෙස ඉල්ලා එක්තරා කණ්ඩායමක් උද්ඝෝෂණයක නිරත වූහ. සිසුන් දෙදෙනෙකු සහ දේශපාලඥයෙකුගේ සහය ඇතුව මෙම උද්ඝෝෂණය පැවැත්විණි.

නොයෙකුත් පුද්ගලයන් වරද නුස්රත්ගේ යැයි පැවසීමට පටන් ගත්ග. මෙම සිද්ධි හේතුවෙන් පවුලේ අය ඇයගේ ආරක්ෂාව ගැන බියට පත් වූ බව ඔවුහු පවසති.

කෙසේ නමුත්, දින එකොළහකට පසු, අප්‍රේල් 6 වන දා සිය අවසාන විභාගයට මුහුණ දීම සඳහා නුස්රත් නැවත පාසල වෙත ගියාය.

“මම මගේ සහෝදරියව පාසලට එක්කගෙන ගිහින් පාසල් ගොඩනැගිල්ලට ඇතුළු වීමට උත්සහ කළා. නමුත් ඇතුළට යන්න නොදී මාව නතර කර ගත්තා” යැයි නුස්රත්ගේ සහෝදරයා වන මහ්මුදුල් හසන් නොමාන් පැවසීය.

“මාව ඒ වෙලාවේ නතර කළේ නැත්නම් මගේ සහෝදරියට මේ වගේ දෙයක් වෙන්නේ නැහැ,” ඔහු පැවසුවේය.

නුස්රත් පැවසූ පරිදි, ඇයගේ යෙහෙළියකට පහර දෙන බව පවසමින් එක් සිසුවියක් ඇයව පාසල් ගොඩනැගිල්ලේ වහල මතට රැගෙන ගොස් තිබේ.

Nusrat Jahan Rafi
නුස්රත්ගේ මරණයෙන් වැලපෙන ඇයගේ සහෝදරයා වන මහමුදුල් හසන්

එම ස්ථානයට ගිය සැණින් බුර්කා ඇඟලා සිටි පුද්ගලයන් කිහිප දෙනෙකු ඇයට තර්ජනාත්මක ස්වරයෙන් කියා සිට ඇත්තේ ප්‍රධාන ගුරුවරයාට එරෙහිව දැමූ පැමිණිල්ල ඉවත් කර ගන්නා ලෙසය. එයට විරුද්ධ වීමත් සමග ඔවුන් ඇයට ගිනි තැබූහ.

මෙය සියදිවි නසා ගැනීමක් ලෙස පෙන්වීමට ඝාතකයන්ට අවශ්‍ය වී තිබූ බව පොලිස් පරීක්ෂණ කණ්ඩායමේ ප්‍රධානී බනාජ් කුමාර් මජුම්දර් පැවසුවේය. ඔවුන් එම ස්ථානයෙන් දිව ගිය පසු නුස්රත් බේරා ගැනීමෙන් ඔවුන්ගේ සැලසුම් සියල්ල ව්‍යර්ථ විය. එමෙන් ම, ඇය මිය යෑමට පෙර ප්‍රකාශයක් ලබා දීමට ද ක්‍රියා කළාය.

“එක් ඝාතකයෙක් ඇයගේ හිස පහතට සිටින සේ අල්ලාගෙන ඉඳලා තියෙන නිසා මුහුණට භූමිතෙල් වැටිලා නැහැ. ඒක නිසා ඇයගේ හිස පිච්චිලා නැහැ” යැයි බනාජ් කුමාර් මජුම්දර් බීබීසී බෙංගාලි සේවයට පවසා තිබේ.

නමුත් නුස්රත්ගේ ශරීරයෙන් 80%ක් පිළිස්සී තිබෙන බව රෝහලට රැගෙන ගිය පසු වෛද්‍යවරු පැවසූහ. පිළිස්සුම් තුවාලවලට ප්‍රතිකාර කිරීම සඳහා ඇය ඩකා නුවර පිහිටි රෝහලකට මාරු කර යැවිණි.

තමන් මිය යන බව දැනුණු නුස්රත් ගිලන් රථය තුළදී සිය සොහොයුරාගේ ජංගම දුරකතනයේ ප්‍රකාශයක් පටිගත කළාය.

“ගුරුවරයා මාව ස්පර්ශ කළා. මම මේ අපරාධයට එරෙහිව මගේ අවසාන හුස්ම දක්වා සටන් කරනවා” යැයි ඇය පවසනු හඬ පටයේ පටිගත වී තිබිණි.

එමෙන් ම, ඇයට පහර එල්ල කළ සමහර ප්‍රහාරකයන් එම පාසලේ ම සිසුන් බවට ඇය හඳුන්වා තිබිණි.

Nusrat Jahan Rafi
ෆෙනී නගරයේ පැවති ඇයගේ අවමංගල්‍ය උත්සවයට දහස් ගණනක පිරිසක් සහභාගී වූහ

බංගලාදේශ මාධ්‍යවල ප්‍රධාන පුවත බවට පත් වූයේ, නුස්රත්ගේ සෞඛ්‍ය තත්ත්වයයි. නමුත් අවසානයේ, අප්‍රේල් 10 වන දින ඇය සදහට ම දෑස් පියා ගත්තාය. ෆෙනී නගරයේ පැවති ඇයගේ අවමංගල්‍ය උත්සවයට දහස් ගණනක පිරිසක් සහභාගී වූහ.

පොලිසිය මේ වන විට 15 දෙනෙකු අත්අඩංගුවට ගෙන ඇති අතර, ඉන් හත් දෙනෙකු මෙම අපරාධයට සෘජුව සම්බන්ධ බව පවසයි. ප්‍රධාන ගුරුවරයාට සහය පළ කරමින් උද්ඝෝෂණයක් සංවිධානය කළ සිසුන් දෙදෙනෙක් ද මේ අතර සිටිති.

ප්‍රධාන ගුරුවරයා තවමත් අත්අඩංගුවේ පසුවේ. එමෙන් ම, නුස්රත් පැමිණිල්ල ඉදිරිපත් කිරීම වීඩියෝගත කළ පොලිස් නිලධාරියා ඔහුගේ නිලයෙන් පහ කර වෙනත් පොලිස් ස්ථානයකට මාරු කර යවා ඇත.

“මේ අපරාධයට සම්බන්ධ කිසි ම කෙනෙකුට නීතියෙන් බේරෙන්න දෙන්නේ නැහැ,” යැයි බංගලාදේශ අගමැතිනි ෂයික් හසීනා මිය ගිය නුස්රත්ගේ පවුලේ අය හමුවෙමින් පවසා තිබිණි.

නුස්රත්ගේ මරණයත් සමග ලිංගික හිංසනයන්ට මුහුණ දුන් කාන්තාවන්ට එල්ල වන හිරිහැරවලට එරෙහිව බංගලාදේශය පුරා උද්ඝෝෂණ පැවැත්වෙන අතර, සමාජ මාධ්‍ය ජාල ඔස්සේ දහස් ගණනක් සිය කෝපය පළ කර තිබේ.

“බොහෝ කාන්තාවන් තමන්ට වෙන ඔය වගේ හිරිහැරවලට විරුද්ධ වෙන්නේ නැහැ. බුර්කා විතරක් නෙමෙයි යකඩෙන් හදපු ගවුම් ඇන්දත් කාන්තා දූෂකයින්ව නවත්තන්න බැහැ” යැයි අනෝවාර් ෂෙයික් බීබීසී බෙංගාලි සේවයේ ෆේස්බුක් පිටුවේ සටහන් කර තිබිණි.

“මගේ ජීවිත කාලය ම මට ඕන වුණේ දුවක් හදන්න. නමුත් දැන් මම ඒකට බයයි. මේ රටේ දුවක් හදනවා කියන්නේ ජීවිතය ම ගෙවන්න වෙන්නේ බයෙන් සහ දුකෙන්,” ලෝපා හොසේන් සිය ෆේස්බුක් පිටුවේ පළ කර සටහනක සඳහන් විය.

බංගලාදේශයේ කාන්තා අයිතීන් පිළිබඳ සංවිධානයක් පළ කළ දත්ත අනුව 2018 වර්ෂයේදී කාන්තා දූෂණ සිද්ධි 940ක් වාර්තා වී ඇතත්, සත්‍ය ගණන ඊට බොහෝ වැඩි බව පරීක්ෂණ කණ්ඩායමක් පවසයි.

Recommended For You

About the Author: Editor