සීනි බදු සංශෝධනය: රජයේ මුදල් පිළිබඳ කාරක සභාව වාර්තාවක් කැදවයි

සීනි බදු සංශෝධනයේදී  එහි වාසිය පාරිභෝගිකයන්ට   හිමි වන්නේද යන්න පිළිබඳව  අපක්ෂපාතී සහ විමර්ශනාත්මක වාර්තාවක් පාර්ලිමේන්තුවේ  රජයේ මුදල් පිළීබඳ කාරක සභාව වෙත ලබා දෙන ලෙස  එම කාරක සභාවේ සභාපති  නීතිඥ අනුර ප්‍රියර්ශන යාපා මහතා   මුදල් අමාත්‍යංශ නිලධාරීන්ට  දැනුම් දුන්නේය.

මුදල් අමාත්‍යංශය විසින්   2020 ඔක්තෝබර් මස 13 පැනවූ අංක 2197/12 දරන ගැස‍ට් පත්‍රය මඟින් ආනයනිත සීනි කිලෝග්‍රෑමයක් සඳහා එතෙක් රු.50.00 ක් ලෙස පැවති බදු මුදල ශත  25 ක් තෙක්   සංශෝධනය  කිරීම මඟින්  එහි වාසිය පාරිභෝගිකයන්ට  කිසිසේත්ම නොලැබී ගිය බවද  මුදල් කාරක සභාවේ සභාපතිවරයා මෙහිදී අවධාරණය කළේය.

මේ අතර, ඉදිකිරීම් සඳහා ගෙන්වන යකඩ කුළුණු පිළිබඳව  බදු සංශෝධනයෙන්ද සාමාන්‍ය පාරිභෝගිකයන්ට එම නිෂ්පාදනවල වාසිය හිමිවන්නේද යන්න පිළිබඳව වාර්තාවක් කාරක සභාව වෙත ලබා දෙන සභාපතිවරයා  තවදුරටත් මුදල් අමාත්‍යංශ නිලධාරීන්ට දැනුම් දුන්නේය.

එසේම, පවතින කොවිඩ් -19 වසංගත තත්ත්වය යටතේ මහා පරිමාණ ඉදිකිරීම් කර්මාන්තකරුවන් කිසිවිටක තමන් ලාභ ලබන බව සඳහන් නොකළද රජයේ බදු සංශෝධනවල වාසිය සැබෑවටම  හිමි විය යුත්තේ පාර්ලිමේන්තුවේ ජනවරම හිමි සාමාන්‍ය මහජනතාවට බවද රජයේ මුදල් පිළීබඳ කාරක සභාවේ සභාපතිවරයා සඳහන් කළේය.

 ඔහු මේ බව සඳහන් කළේ , පසුගිය ඔක්තෝබර් මස සිට  නිකුත් කළ මුදල් අමාත්‍යංශයට අදාළ අති විශේෂ ගැසට් පත්‍ර කිහිපයක්  පසුගියදා (05) රජයේ මුදල් පිළීබඳ කාරක සභාවේදී අවධානයට ගැනුණු අවස්ථාවේ දී ය . 

 මෙහිදී සාකච්ඡාවට ගැනුණු  වෙනත් කරුණු අතර ටින් කරන ලද දේශීය කරදිය සහ මිරිදිය මත්ස්‍ය නිෂ්පාදනය දිරිගැන්වීමට ගත යුතු පියවර,සෞඛ්‍ය පරීක්ෂණ කට්ටල සඳහා  බදු සංශෝධනය, ආරක්ෂක  මුව ආවරණ  කට්ටල සදහා සංකේතාංක සංශෝධනය  ද අයත්ව තිබිණි . එසේ වුවද ජනතාවට වඩා යහපත් දිවියක් ගත කිරීමට ඇවැසි සියලු සාධනීය වෙනස්කම් රාජ්‍ය යාන්ත්‍රණය විසින් ගත යුතු බව  සභාපතිවරයා අවධාරණය කළේය. 

Recommended For You

About the Author: Editor

Leave a Reply

Your email address will not be published. Required fields are marked *