අපේ‍්‍රල් 21 ප‍්‍රහාරයට තෙමසක් පිරෙන අවස්ථාවේ ආණ්ඩුවට කරන සියලූ චෝදනා ප‍්‍රතික්ෂේප කරනවා – ජනාධිපති

අපේ‍්‍රල් 21 ප‍්‍රහාරයට තෙමසක් පිරෙන අවස්ථාවේ ඇතැමුන් ආණ්ඩුවට කරන සියලූ චෝදනා ප‍්‍රතික්ෂේප කරන බව ජනාධිපති මෛත‍්‍රීපාල සිරිසේන මහතා පවසයි.

අපේ‍්‍රල් 21 සිදුවීමෙන් පසු ආණ්ඩුවක් ලෙස ඉටුකළ යුතු සෑම වගකීමක්ම ඉටු කළ අතර ඊට අදාළ ත‍්‍රස්ත සංවිධානය ශ‍්‍රී ලංකාවෙන් විනාශ කර දැමුවා පමණක් නොව අදාළ සිදුවීමට ඉඩ සැළසුණු සියලූ කරුණු පිළිබද මේ වන විට අපක්ෂපාතී සහ ස්වාධීන පරික්ෂණ සිදු කෙරෙන බව ද ජනාධිපතිවරයා කියා සිටියේය. එබැවින් පෞද්ගලික දේශපාලන න්‍යාය පත‍්‍ර අතේ තබාගෙන අපේ‍්‍රල් 21 සිදුවීම පිළිබද තීන්දු තීරණ ඉදිරිපත් නොකරන ලෙස තමා සියලූ දෙනාගෙන් ඉල්ලා සිටින බව ද ජනාධිපතිවරයා පැවසීය.

ජනාධිපතිවරයා මේ බව සදහන් කළේ අද (22) පස්වරුවේ කොළඹ සුගතදාස ගෘහස්ථ කි‍්‍රඩාංගණයේ පැවති 'සත්විරු අභිමන් 2019' රණවිරු සුබසාධන ප‍්‍රතිලාභ ප‍්‍රදානය කිරීමේ උත්සවය අමතමිනි. මෙහි දී අදහස් දැක්වූ ජනාධිපතිවරයා වැඩිදුරටත් කියා සිටියේ තමා සෑම ආගමකටම ගරු කරන නායකයෙකු වන අතර සෑම ආගමික නායකයෙකුටම වන්දනා කරන බවයි. යම් ප‍්‍රශ්නයක් තිබේනම් ඕනෑම අයෙකුට විවෘතව තමා සමග සාකච්ඡුා කළ හැකි අතර අවශ්‍ය නම් මාධ්‍ය ඉදිරියේ වුවද එය සිදුකළ හැකි බව ජනාධිපතිවරයා කියා සිටියේය.

තමා පිටකොන්දක් නැති නායකයෙකු ලෙස පෙන්වීමට ඇතැම් අය උත්සාහ කළ ද තමා පිටකොන්දක් ඇති ඝෘජු නායකයෙකු බව 2015 ජනාධිපතිවරණයේ දී මෙන් ම තවත් අවස්ථා ගණනාවකදීම රටට පෙන්වා ඇතැයි ද ජනාධිපතිවරයා සඳහන් කළේය. පැවති රජයේ මෙන් ම පවතින රජයේ ද වංචා සෙවීමට කොමිෂන් සභා පිහිටෙව්වේ පිට කොන්දක් ඇති නායකයෙකු ලෙස බව පැවසූ ජනාධිපතිවරයා ජාවාරම්කරුවන්, පාතාලයින්, අපරාධකරුවන් සමග තමා සටන් වදින්නේ ද පිට කොන්දක් ඇති නායකයෙකු ලෙස බව කියා සිටියේය.

මෙහි දී ජනාධිපතිවරයා වැඩිදුරටත් සඳහන් කළේ පිටකොන්දක් ඇති අය සිදු කළ යුත්තේ විවේචන සිදු කිරීම නොව ජාවාරම්කරුවන්ගෙන්, අපරාධකරුවගෙන් රට ගලවා ගැනීමට ගෙන යන සටනට සහය ලබාදී රට ගොඩනැගීමට එක්වීම බවයි. විවේචන අවශ්‍ය වුවත් එය රට සහ ජනතාව නොමග යවන සහ ආණ්ඩුවක් අපහසුතාවයට පත්කරන බරපතළ විවේචන නොවිය යුතු අතර, අද එම විවේචන කරන සියලූ දෙනා පාවා දෙන්නේ අපේ‍්‍රල් 21 ත‍්‍රස්ත ප‍්‍රහාරය හමුවේ අපගේ විරෝධාර රණවිරුවන් ප‍්‍රමුඛ සමස්ථ ආරක්ෂක අංශ දිවි පරදුවට තබමින් ඉටුකළ විශිෂ්ට මානුෂික මෙහෙවර බව ද කියා සිටියේය.

එමෙන්ම ජනාධිපතිවරයා වැඩිදුරටත් සදහන් කළේ අපේ‍්‍රල් 21 කණගාටුදායක සිදුවීමෙන් මිය ගිය සියලූ දෙනා පිළිබඳ තම හදවත් තුළ ඇති වේදනාව එදා මෙන්ම අද දවසේ ද එලෙස ම බවත් එය කිසිදා අමතක කළ නොහැක්කක් බවයි.

තිස් වසරකට අධික කාලයක් පැවති කුරිරු ත‍්‍රස්තවාදය අවසන් කළ විරෝධාර රණවිරුවන් වෙනුවෙන් සුබසාධන ප‍්‍රතිලාභ ලබාදීම මෙහිදී සිදු කෙරුණු අතර ති‍්‍රවිධ හමුදාවේ, පොලිසියේ හා සිවිල් ආරක්ෂක දෙපාර්තමේන්තුවේ රණවිරුවන් සහ රණවිරු දරුවන් 1504ක් වෙනුවෙන් මෙම ප‍්‍රතිලාභ ලබාදීම සිදු විය. ඒ අනුව සම්පූර්ණ නිවාස 25ක්, අඩක් නිමවු නිවාස සම්පූර්ණ කරදීමේ ප‍්‍රතිලාභ 925ක්, විරු සිසු ප‍්‍රදීප ශිෂ්‍යාධාර 308ක් සහ පදිංචිය සඳහා ඉඩම් කොටස් 246ක් ලබාදීම ඇතුළු වැඩසටහන් කි‍්‍රයාත්මක විය.

Recommended For You

About the Author: Editor