සංවර්ධනයේ නාමයෙන් ජනතාව මත ණය බර පැටවීම සංවර්ධනයක් නොවෙයි – ඇමැති රවී කරුණානායක

රටක් සංවර්ධනය කළ යුතු නමුත් එය ජනතාවට ඔරොත්තු දෙන ආකාරයෙන් සිදු කළ යුතු බවත් එසේ නොමැතිව සංවර්ධනය මුවාවෙන් ජනතාවට ලක්ෂයක් දෙකක් ණයට දී ඔවුන් ණය බරට තල්ලු කිරීම නොකළ යුතු බවත් විදුලිබල, බල ශක්ති හා ව්‍යාපාර සංවර්ධන ඇමති රවී කරුණානායක මහතා කියයි.

කරුණානායක මහතා මෙම අදහස් ප්‍රකාශ කළේ, ඊයේ (31) පස්වරුවේ කොළඹ‍ පැවති උත්සවයකට එක්විමෙන් අනතුරුව මාධ්‍ය වෙත අදහස් දක්වමිනුයි.

එහිදී වැඩි දුරටත් අදහස් දැක්වූ අමාත්‍යවරයා,

‘‘පාසලක් කියන්නේ දැනුම වර්ධනය කරගන්න පුළුවන් තැනක්. එහෙම ස්ථාන වැඩි දියුණූ කිරීමෙන් අපේ රටේ දරු පරපුර, තරුණ පරපුර බුද්ධිමත් භාවයෙන්, හැදියාවෙන් වැඩිදියුණූ වෙනවා. ඒ තුළින් ඔවුන් නොමග යාමේ ප්‍රවණතාව අවම වෙනවා. ඒ නිසා පාසලක් අරිනවා කියන්නේ බන්ධනාගාර වැසෙනවා කියන හේතුසාධක සහිත කතාවක්.

නමුත් ගෙවල් හදනවා කියන එක ඒ වගේ කටයුත්තක් නොවෙයි. රටක් සංවර්ධනය කළ යුතුයි. හැබැයි ජනතාවට ඔරොත්තු දෙන ආකාරයෙන් තමයි ඒ දේවල් සිදුකළ යුත්තේ. එහෙම නැතිව සංවර්ධනය කරනවා කියලා ජනතාවට ලක්ෂයක් දෙකක් ණයට දීලා ඔවුන්ව ණය බරට තල්ලු කරන එක නෙමෙයි කළයුත්තේ.

පාස්කු ඉරුදින එල්ල වූ බෝම්බ ප්‍රහාරයෙන් පසුව රටේ ඇතිවූ අනාරක්ෂිත තත්ත්වයන් හමුවේ, ඕල්කට් මාවතේ සිදුවෙමින් පැවති වෙළදාම්වලට තාවකාලික තහනමක් ක්‍රියාත්මක කිරීමට පොලීසියට සිදු වුණා. මේ වනවිට එම අස්ථාවර තත්ත්වයන් පහව ගොස් ඇති බැවින් එසේ ක්‍රියාත්මක කිරීමට යෙදුන තාවකාලික තහනම ඉවත් කර වෙළඳ සංගමයට ඇතිවී තිබෙන අපහසුතාවන් ඉවත් කිරීමට පොලීසිය සමග සාකච්ඡා කර අවශ්‍ය පියවර ගන්නවා.

අපි බොහොම සෘජුයි. දවසින් දවස අපි වෙන වෙන තාල තියන්නේ නැහැ. එක එක්කෙනා එහෙ මෙහෙ කෑගැහුවට අපේ තීරණ වෙනස් වෙන්නේ නැහැ. ජයග්‍රහණය කරන්න පුළුවන් සුදුසු පුද්ගලයෙක් අපි නියම වෙලාවට ඉදිරිපත් කරනවා. නමුත් තවමත් අපි පක්ෂයෙන් කිසිදු කෙනෙක් සම්බන්ධයෙන් තීන්දුවක් අරගෙන නැහැ.

මුහුණුපොතේ එක් මන්ත්‍රීවරයෙක් ප්‍රකාශයක් කරලා තිබුණා මම එතුමාට මඩගසන්න ලක්ෂ 03ක් වියදම් කරලා කියලා. තඹ සතයක් නොවටින කෙනෙක්ට මඩගහන්න ඇයි මම වියදම් කරන්නේ ? ඒ කියන අය තමයි එහෙම දේවල් කරන්නේ. එයාලා ඒ දේවල් කරලා හිර වුණාම, අනිත් අයට පද හදනවා. මේ වගේ විලිලැජ්ජා නැති කතා කියන අය එක්සත් ජාතික පක්ෂයේ ඉන්නවා කියන එක වසර 25 ක් තිස්සේ පක්ෂය රැකගත්ත අපිටත් ලැජ්ජාවක්’’ යැයි ද අමාත්‍ය රවී කරුණානායක මහතා පැවසුවා.

Recommended For You

About the Author: Editor