Full Story: එක රටක් තුළ තිබිය හැක්කේ එක් නීතියක් පමණයි – ගෝඨාභය රාජපක්ෂ

ඊයේ (31) කොළඹ කි‍්‍රංස්බරි හෝටලයේ පැවැති ශී‍්‍ර ලංකා පොදුජන නීතීඥ සංගමයේ සම්මේලනය අමතමින් ගෝඨාභය රාජපක්ෂ මහතා කළ කතාව

ශ්‍රී ලංකා ජනරජයේ පස්වෙනි විධායක ජනාධිපති, ශ්‍රී ලංකා පොදු ජන පෙරමුණේ නායක  මහින්ද රාජපක්ෂ මැතිතුමන්ගෙන් අවසරයි.

ශ්‍රී ලංකා පොදුජන පෙරමුණේ සභාපති මහාචාර්ය ජී.එල් පීරිස් මැතිතුමා සහ ජාතික සංවිධායක බැසිල් රාජපක්ෂ මැතිතුමා ප්‍රධාන ගරු පාර්ලිමේන්තු මන්ත්‍රීවරුන් ඇතුලු සියලූම මහජන නියෝජිතවරුණි, හිටපු අගවිනිසුරුවරුන් වන සරත් එන් සිල්වා සහ මොහාන් පීරිස් මහත්වරුනි, හයිද්‍රාබාද් විශ්ව විද්‍යාලයේ උපකුලපති ෆයිසා මුස්තාපා මැතිතුමනි,  ශ්‍රී ලංකා පොදු ජන පෙරමුණේ නීතීඥ සංගමයේ සභාපතිතුමා ඇතුලු මේ සමුලුවට සහාභාගී වී සිටින සියලූම පක්ෂ සාමාජික සාමාජිකාවනි, සමුළුවේ සම්පත් දායකයනි, ආරාධිත අමුත්තනි, මාධ්‍යවේදීනි, මෙරට හා පිටරට සිට   අද මේ සමුළුවට සජීවීව සම්බන්ධවන සියලූම දේශප්‍රේමී ශ්‍රී ලාංකිකයනි, හිතවතුනි. 

පසුගිය අගොස්තු මස 11 දා පැවති පක්ෂයේ මහා සම්මේලනයේදී  ශ්‍රී ලංකාවේ පස්වන විධායක ජනාධිපති මහින්ද රාජපක්ෂ මැතිතුමා විසින්  ශ්‍රී ලංකා පොදුජන පෙරමුණ ප්‍රමුඛ දේශපාලන පක්ෂ ගණනාවක මෙන්ම ස්වාධීන සංවිධාන හා කණ්ඩායම් රැසක  පොදු අරමුණ නියෝජනය කරන ජනාධිපති අපේක්ෂකයා වශ‍යෙන් මාව නම්කරනු ලැබීමෙන් පසු මා ප්‍රථමවරටයි නීතීඥයින් මෙතරම් විශාල සංඛ්‍යාවක් එකවර හමුවන්නේ.  

අද දින ඔබ අමතා අදහස් කිහිප‍යක් ප්‍රකාශ කිරීමට මේ ලද අවස්ථාව ගැන මා ඉතාමත් සතුටු වෙනවා.

නීතිය යන සංකල්පය ශිෂ්ඨාචාරවත් සමාජයක අත්තිවාරම යැයි කියතොත් එය නිවැරදියි. නීතිය යන සංකල්පය ක්‍රියාත්මක කිරීම සඳහා අනිවාර්යයෙන්ම අපට නීති පද්ධතියක්ද තිබිය යුතුමය. එවැනි නීති පද්ධතියක් සමාජය තුළ ගොඩනැගීම සඳහා නීතියේ ආධිපත්‍ය යන සංකල්පය නිර්මාණය කර ඇති වග අප කවුරුත් දන්නා කරුණකි. නීතියේ ආධිපත්‍ය සුරැකිය හැක්කේ ප්‍රජාතන්ත්‍රවාදී ආණ්ඩු ක්‍රමයන් තුළ සහ රාජ්‍ය බලය සීමා කරන LIMITED GOVERNMENT රාමුවක් තුළ බව  කවුරුත් පිළිගන්නා කරුණක්.

එනිසා නීතියේ ආධිපත්‍ය සහ ප්‍රජාතන්ත්‍රවාදය යන ඉතාමත් ස්වර්ණමය සංකල්පයන්  ජනතාවගේ සුභසිද්ධිය සහ දියුණුව සඳහා අනිවාර්යයෙන්ම ආරක්ෂා කල යුතු බව අප කවුරුත් දන්නා කරුණකි. ලංකාව ප්‍රජාතන්ත්‍රවාදී රටක්.  ආසියානු මහාද්වීපයේ රටවල් අතුරින් ප්‍රථමයෙන්ම සර්වජන ඡන්ද බලය හිමි වූයේ ශ්‍රී ලාංකාවටයි.   

සර්වජන ඡන්ද බලය මගින් සිදුවන්නේ, පරමාධිපත්‍ය බලය  ජනතාව සතු වීමයි. ජනතාවගේ පරමාධිපත්‍යය ආරක්ෂා කිරීමේදී නීතියේ ආධිපත්‍යය රටකට ඉතා වැදගත් වෙනවා.  මනුෂ්‍ය සංහතිය ඔවුන්ගේ ස්වාභාවික අයිතිවාසිකම් සියල්ලක්ම අතහැර සිවිල් අයිතිවාසිකම් සමූහයක් සමඟ සම්බන්ධ වී ස්වෛරී රාජ්‍යයක ජනතාවක් වශයෙන් ජීවත්වීමට ගිවිසාගෙන ඇත්තේ යම්කිසි වගකීම්, අයිතිවාසිකම් හා බලාපොරොත්තු ඉටු කර ගැනීම සඳහායි. 

මෙම සාමාජීය ගිවිසුම් නිසි ක්‍රමවේදයක් ඔස්සේ සාධාරණ ආකාරයකට ක්‍රියාත්මක කිරීමේ උත්තරීතර වගකීම ඉහල මට්ටමින්ම ඉෂ්ඨ කර ගැනීමට නම් අප ජීවත් වන සමාජයත් එම සමාජයේ පාලකයන් ද අනිවාර්යයෙන්ම නීතියේ ආධිපත්‍යයට ගරු කළ යුතුය. ඔබ කවුරුත් දන්නා නීතිය පිළිබඳ  මූලික සංකල්ප කිහිපයක් මම ඔබට මතක් කරන්න කැමතියි.  පලමුව නීතිය පැහැදිලි විය යුතුය. දෙවනුව එය පහසුවෙන්ම හැදෑරීමට සහ තේරුම් ගැනීමට හැකි විය යුතුය. තුන්වනුව නීතිය ක්‍රියාත්මක වීමේදී එහි ප්‍රතිඵලය කිමෙක්ද යන්න සම්බන්ධයෙන් අනාවැකියක් ප්‍රකාශ කළ හැකි විය යුතුය.   සිව්වනුව ආණ්ඩු ක්‍රම ව්‍යවස්ථාව තුළ විධායක, ව්‍යවස්ථාදායකය සහ අධිකරණය යන අංශ තුන තුළ බලතල බෙදා හැරීමේ න්‍යායට ගරු කල යුතුයි. පස්වනුව මහජනතාව සහ රජය ආණ්ඩුක්‍රම ව්‍යවස්ථාවේ ප්‍රථිපාදන වලට ගරු කල යුතුය. හයවනුව නඩුකර හැකි ඉක්මනින් අවසන් කිරීමට සෑම ප්‍රයත්නයක්ම ගත යුතුයි. නඩුකරයන් අවම වියදමින් අවසන් කරගත හැකි පරිසරයක් ගොඩ නැගිය යුතුය. නීති පද්ධතිය දූෂනයෙන් තොර  විය යුතුය.

ප්‍රජාතන්ත්‍රවාදය  ආරක්ෂා කිරීම සඳහායැයි  පිහිටුවා ඇති ආයතනික ව්‍යුහය ජනතාවගේ පරමාධිපත්‍ය ආරක්ෂා කිරීම වෙනුවට  දේශපාලන අවශ්‍යතා සඳහා භාවිත කිරීමට අප තවදුරටත් ඉඩ නොදිය යුතුයි. ඒ වෙනුවට ඒ ආයතන වලට සැබෑ ස්වාධීනත්වයක් ලබා දී ඒවා තව දුරටත් ශක්තිමත් කිරීම තුලින් ජනතාව සවිබල නැංවීමට ඔබේ උපදෙස් හා සහාය අපි බලාපොරොත්තු වෙනවා.

JUSTICE DELAYED IS JUSTICE DENIED  කියා ප්‍රසිද්ධ කියමනක් තිබෙනවා අධිකරණ පද්ධතිය තුල ඇති ප්‍රමාදය අද සාමාන්‍ය ජන ජීවිතයට බලපාන විශාල ප්‍රශ්නයක්.

මෙම ප්‍රමාදයන් වලක්වා ගැනීම සඳහා අවශ්‍ය යටිතල පහසුකම් ගොඩ නංවන ගමන්ම යල් පැන ගිය නීති ක්‍රියාපටිපාටි හා අනපනත් සංශෝධනය කොට අනාගතයට ගැලපෙන නීති පද්දති සකස් කර ගැනීමට ඔබ සැමගේ සහාය අනාගතයේදී අපට අවශ්‍ය වෙනවා.

නීතිය කඩිනමින් පසිඳලන්නට දැනට ඇති අධිකරණ හා විනිසුරුවන් ප්‍රමාණවත්ද යන්න අපට විමසා බලන්නට සිදු වෙනවා. නීතියේ ප්‍රමාදයන් වැලක්වීමට කෙටිකාලීන මෙන්ම දීර්ඝ කාලීන විසඳුම් සොයන්නට අපට සිදු වෙනවා. ඒ අතර යටිතල පහසුකම් වැඩි දියුණු කිරීම, දේශීය හා විදේශීය පුහුණුව මෙන්ම නීතිය ක්‍රියාත්මක කිරීමට සහය වන ආයතන ප්‍රතිව්‍යුහ ගත කිරීමද ඇතුලත් වෙනවා. 

අපේ රටේ සංවර්ධනයේ ඉදිරි පිම්මක් සඳහා තාක්ෂනය බහුලව භාවිතා කිරීමට අප අදහස් කරනා නිසා සිංගප්පුරුව වැනි රටවල ක්‍රියාත්මක වන ඩිජිටල් තාක්ෂණය සහිත අධිකරණත් අපට ක්‍රම ක්‍රමයෙන් හඳුන්වාදෙන්න පුළුවන්. 

ජනතාව අපේක්ෂා කරණ සෞභාග්‍යමත් දේශය ගොඩ නැගීමේදී  අපට ජාතික ආරක්ෂාව හා ආර්ථික සංවර්ධනය ඉතා වැදගත් වෙනවා. ජාතික ආරක්ෂාව ගැන කතා කරනා විටත් නීතියේ ආධිපත්‍යය ඉතා වැදගත් වෙනවා. එක රටක් තුල ක්‍රියාත්මක විය හැක්කේ එක නීතියක් පමනයි. නීතිය හැමට සමානව ක්‍රියාත්මක විය යුතුයි. පුරවැසියා හැමවිටම නීතිගරුක විය යුතුයි, නමුත් පුරවැසියා නීතිය ක්‍රියාත්මක කරණ ආයතන වලට හා පුද්ගලයන්ට බය නම් එහි ගැටලුවක් තිබෙනවා. නීතියේ ආධිපත්‍ය ගැන කතා කරණා විට අපි මතක තබා ගත යුතුයි නීතිය ක්‍රියාත්මක කරණ ආයතන හා පුද්ගලයනුත් නීතියට යටයි කියනා බව. ඔවුන් සම්බන්න්දයෙනුත් නීතිය සාධාරණව ක්‍රියත්මක විය යුතුයි. 

නීතිය සැමට සමානය යන උත්තරීතර සංකල්පය අභියෝගයට ලක් කරමින් රජයේ ඉහල නිලධාරීන් නීතිය නමන හැටි කියනවා පසුගිය කාලයේ ජනතාව මාධ්‍ය වලින් දුටුවා. පසුගිය පාස්කු ඉරිදා ප්‍රහාරය ගැන විශේෂ කමිටුවක් මගින් විමර්ශනයක් කරනා ලෙස අපි ඉල්ලා සිටියේ ඒ නිසායි.  එසේ නොකලහොත් යම් දේශපාලන බලවතුන් නීතියේ රැහැනින් පිට පැනිය හැකි බව අපට පෙනෙනවා.

නීතිය යනු ජීවමාන සංකල්පයක්.  මනුෂ්‍ය සමාජයේ සිදුවන වෙනස්කම් අනුව නීතියේත් වෙනස්කම් සිදු වෙනවා. ඒ නිසා  අද නූතන ලෝකයේ සංවර්ධනය වූ රටවල් නීති වෘත්තියේ තත්වය ඉහල මට්ටමකින් පවත්වාගෙන යාමට අනුගමනය කරනු ලබන එක් යාන්ත්‍රනයක් නම්  CONTINOUS LEGAL EDUCATION  යන සංකල්පයයි.  මේ සම්බන්ධයෙනුත් පහසුකම් වැඩිකරනා ආකාරය අප සාකච්චා කල යුතුයි.

ගෝලීය ආර්ථික තුල  තුල ආසියානු කලාපය බලවත් වෙමින් සිටිනා  මේ මොහොතේ අපත් ඒ ප්‍රවණතාවයෙන් උපරිම ප්‍රයෝජන ගත යුතුයි. අපනයන ආර්ථිකය ශක්තිමත් කල යුතුයි. ලෝකය සමඟ සම්බන්දීකරණයේදී අපේ සුවිශේෂී  භූගෝලීය පිහිටීමෙන් ප්‍රයෝජන ගත යුතුයි. මේ කරුණු වලදී අපට ජාත්‍යන්තර නීති රීති ගැන මනා දැනුමක් තිබිය යුතුයි.  මේ අවශ්‍යතාවය තේරුම් ගෙන අදාල ක්ෂේත්‍ර සම්බන්ධයෙන් අපේ දැනුම වර්ධනය කර ගැනීම සඳහා පියවර ගන්නා ලෙස මම ඔබෙන් ඉල්ලා සිටිනවා

කාලීන ජාතික  අවශ්‍යතාවන්ට ගැලපෙන පරිදි  ව්‍යවස්ථා සංශෝධනය, යල්පැනගිය නීති රීති  යාවත්කාලීන කිරීම, මැතිවරණ නීතිවල වෙනස්කම් වැනි නීති ප්‍රජාවේ සහාය අවශ්‍ය කරන වැඩකටයුතු රාශියක් අප ඉදිරියේ තිබෙනවා. ඒ සඳහා ඉදිරියේදී නීති විශාරදයන්ගෙන් මෙන්ම  ඒ ඒ ක්ෂේත්‍රයන්ට අදාල විද්වතුන්ගේ සහාය ලබාගන්නට  අපි කටයුතු කරණවා. 

මම ඔබට මතක් කරන්නට කැමතියි අපි නව තාක්ෂණය් භාවිතය අතින්  හැකි පමන ඉදිරියට යන්නට බලාපොරොත්තු වන බව. මෙය ඔබටත් වදගත් වෙනවා. ඊශ්රායලයේ හිටපු අග්‍ර විනිශ්චයකාර තුමෙක් වන අහරොන් බරක් මැතිතුමා පෙන්වා දී තිබෙනවා සමාජය තුල තම වෘත්තීමය වටිනාකම පවත්වාගන්නට නම් වේගයෙන් වෙනස් වන ලෝකය තුල නූතන තාක්ෂණ ප්‍රවණතාවන් හඳුනාගෙන ඒවා භාවිත කිරීමට සෑම ප්‍රයත්නයක්ම ගත යුතු බවයි. 

ප්‍රජාතන්ත්‍රවාදී රටක පුරවැසියෙකුගේ මූලිකම අයිතිය තමයි චන්දය දීමේ අයිතිය. අපි මේ ප්‍රජාතන්ත්‍රවාදී අයිතිය යලි ස්ථාපිත කරනවා. සර්ව බල චන්දයට ගරු කරන , මහජන මතයට හිස නමන , නීතියේ ආධිපත්‍යය වචනයට සීමා නොවේ සැබැවින්ම ක්‍රියාත්මක වන පාලන තන්ත්‍රයක් අපි ඇති කරනවා

අපේ ව්‍යවස්තාව තුල ජනතාවගේ මූලික අයිතීන් හොඳින් ස්ථාපිත කොට තිබෙන්වා. ඒ වාගේම ජනතාවගේ වගකීමුත් පැහැදිලි කර තිබෙනවා. සතුටින් ජිවත් වන්නට ඔබට ඇති අයිතිය අයට හිරිහැරයක් නොවනා ආකාරයට ජීවත් වන්නට සෑම පුරවැසියෙකුටම වගකීමක් තිබෙනවා.  ගුණ ගරුක , විනය ගරුක,  නීති ගරුක සමාජයක්  ගොඩ නැංවීම අද ඔබ සියලු දෙනාගේම අපේක්ෂාව වී තිබෙනවා.

ඒ සඳහා අවශ්‍යකරණ  නායකත්වය දීමට මම සූදානම්. අපේ පොදු අරමුණ ඉටුකරගැනීම සඳහා ඔබ සියලු දෙනාගේමත් සහාය  මම බලාපොරොත්තු වෙනවා. ඔබ සියලු දෙනාටම මම සුබවාදී  අනාගතයක් ප්‍රාර්ථනා කරනවා 

බොහොම ස්තූතියි” තෙරුවන් සරණයි

Recommended For You

About the Author: Editor