අනං මනං වැඩක් නෑ පක්ෂය ආරක්ෂා කරන්න ඕන – චන්ද්‍රිකා බණ්ඩාරනායක

ශ‍්‍රීලනිපය රැක ගන්න වුවමනා නම් පොහොට්ටුවට ඡන්දය දෙන්න එපා – කුමාර වෙල්ගම

මහින්ද රාජපක්ෂ යුද්ධ කළේ තමන් විසින් ගෙන් වූ අවි ආයුධවලින් බවත් යුද්ධයෙන් තුනෙන් එකක් අවසන් කළේ තමා බවත් හිටපු ජනපතිනී, ශ‍්‍රී ලංකා නිදහස් පක්ෂයේ අනුශාසක චන්ද්‍රිකා බණ්ඩාරනායක මහත්මිය පැවසුවාය.

හිටපු ජනපතිනිය මේ බව සදහන් කළේ ‘ශ්‍රී ලංකා නිදහස් පක්ෂය සුරැකීමේ සංවිධානය’ විසින් අද (5) කොළඹ සුගතදාස ගෘහස්ත ක්‍රීඩාංගණයේ දී පැවැත් වූ විශේෂ ජනරැළිය අමතාය.

මේ සදහා පාර්ලිමේන්තු මන්ත්‍රී කුමාර වෙල්ගම, එක්සත් ජාතික පෙරමුණේ පාර්ලිමේන්තු මන්ත්‍රීවරුන් වන අර්ජුණ රණතුංග, රාජිත සේනාරත්න, මංගල සමරවීර, මනෝ ගනේෂන්, ජයම්පති වික්‍රමරත්න හිටපු අමාත්‍ය ආතාවුද සෙනෙවිරත්න, වික්‍රමබාහු කරුණාරත්න මහතා ඇතුළු පිරිසක් මෙම අවස්ථාවට සහභාගී වුණා. එහිදී වැඩි දුරටත් අදහස් දැක්වූ හිටපු ජනපතිනිය,

”අපේ පක්ෂ මේ රටේ තිබුණ අවංකම නියම පක්ෂය බව මම කියනවා. අපේ නායකවරු අවුරුදු 54 ක් තමන්ගේ දේවල් ජනතාව වෙනුවෙන් කැප වුණා මිස රටේ දේවල් දැහැගත්තේ නැහැ. ලේ හලලා ප්‍රජා අයිතිවාසිකම් රැක්කේ. 2005 පස්සේ ඒ තත්ත්වය සම්පූර්ණයෙන් විනාශ වුණා. රාජ්‍ය පාලන තන්ත්‍රය හිතා මතා දූෂ්‍ය කරා.

ඒ අයගේ හොරකම් කතා කරන්නේ නෑ. කීප දෙනෙක් කරන්න ඇති සුළු වශයෙන් .මේ රටට අඩු තරමින් ප්‍රජාන්ත්‍රවාදී පක්ෂ දෙකක් ඕනි. එක පක්ෂයක් තියාගෙන රටක් ගොඩ නගන්න බෑ. අපේ පක්ෂ ලේසියෙන් මරන්න බෑ. දැන්  මේ අය පක්ෂය විනාශ කරලා මොකද්ද සෙල්ලමක් කරන්න හදනවා.

අපේ පක්ෂය කීතු කීතු කළා. අනුශාසක වුණත් මාව පක්ෂයේ කිසිම දෙයකට සම්බනධ කර ගන්නේ නෑ. පක්ෂයේ සියයට 95ක් කිව්වේ ඉන්න සභාපති මෙවර ජනපතිවරණයට ඉදිරිපත් විය යුතුයි කියලා. සමස්ත ලංකා කාරක සභාවේ බහුතරයක් කියපු දේ පිළිගන්නේ නැතිව පක්ෂයේ ලේකම් ඇතුළු කිහිප දෙනෙක් පොහොට්ටුවට එකතු වුණා.

අනං මනං වැඩක් නෑ පක්ෂය, රට ආරක්ෂා කරන්න ඕන. මගේ අදහස නම් මෙවැනි අවස්ථාවකදී පුද්ගලයෝ කවුද කියලා හිතන්නේ නැතිව ප්‍රතිපත්තිය ගැන සිතිය යුතුයි.

2015දී මම තීරණය ගත්තෙන් ඒ ආකාරයෙන්. ඒ තීන්දුවට ආවේ රට හදන්න පුළුවන් කියන තීන්දුව උඩයි. අද ප්‍රධාන අපෙක්ෂකයන් දෙන්නයි. නව ප්‍රජාතන්ත්‍රවාදී පෙරමුණේ අපේක්ෂකයා හා පොහොට්ටුවේ අපේක්ෂකයා. ඔවුන් දෙදෙනාගේම මැතිවරණ ප්‍රකාශන බැලුවා. ගෝඨාභය රාජපක්ෂ මහතාගේ කතාවල ලස්සන කතා තිබෙනවා.

මිනිස්සුන්ට නිදහස දෙනවලු, මට නම් බක බක ගාලා හිනා ගියා. තව මොනද කරනවලු. අවුරුදු 9ක් හිටපු වෙලාවේ දුප්පත් ජනතාව වෙනුවෙන් අනුගමනය කළ ප්‍රතිපත්ති මොනවද? මහා විශාල ලෙස යුද්ධය කරපු මගේ ආණ්ඩුව යටතේ රාජ්‍ය සේවක පඩිය මම පස් ගුණයකින් වැඩි කළා.

මම යුද්ධයෙන් තුන් කාලයක් ඉවර කළා. යුද්ධය කළේ මම ගෙන්වපු ආයුධ තුළින්. දූෂණය පිටු දකිනවලු. ශතවර්ශයේ ලොකුම විහිලුව. මුළු ලෝකයේම වැඩිම මිලට හදපු පාරවල් හැදුවේ රාජපක්ෂ ආණ්ඩුව. වෙන මොනවද කළේ. වාරිමාර්ග දියුණු කළාද, අධ්‍යාපනය දියුණු කළාද?

රාජපක්ෂ යුගයේ තමයි තරුණ දරුවන් අතර මන්දපෝෂණය වැඩිවුණේ. මම ගෝඨාභය රාජපක්ෂගෙන් අහන්න කැමතියි මිනිසුන්ගේ නිදහස තහවුරු කරන්නේ කොහොමද කියලා. මාධ්‍යවේදීන් මරා දමනවද නැත්ද? අනිත් අපේක්ෂක තුමාගේ වැඩපිළිවෙළ මම දැක්කා ඉතාමත් සාර්ථක වැඩපිළිවෙළක් තිබෙනවා.

මේ රජය සමයේ සෞඛ්‍ය විශාල ලෙස දියුණු කළා. අධ්‍යාපනයේ විශාල වැඩ කොටසක් කළා. මමත් හීන් සැරේ උදව් කළා. ආර්ථිකය විශාල වශයෙන් ශක්තිමත් කළා. තවත් කර ගන්න බැරි වෙලා තිබෙනවා. එහෙම තියෙද්දීත් පඩි වැඩි කළා.

අපි අත්තනගල්ලේ අලුත් වැව් හතරක් හැදුවා. රජයෙන් මේවයි කළේ කියලා ජනතාවට කියන්න දන්නේ නෑ. මේ රජයේ මාධ්‍ය පවුල්වලින් ආපු නායකයෝ ඉන්නවා ඒත් ඒ දේ කරන්න දන්නේ නෑ. කියලා තියෙන දේවල් වෙන්න පුළුවන්. හැබැයි මට සහතික වෙන්න බෑ. එක්කෙනෙකුට සහතික වෙලා මම ගුටිකෑවා.

පක්ෂය නීත්‍යානුකූලවම තවමත් පොහොට්ටුවට එක් වෙන්න තීන්දුවක් නෑ. නීති විරෝධී ලෙස පොහොට්ටුවේ එල්ලුනා. හත්වතාවක් පක්ෂය මාරු කරපු ලේකම් කියනවා අපිව අස් කරනවලු. පක්ෂයේ ව්‍යවස්ථාව අනුව අස් කරන්නත් අවුරුද්දක් විතර යනවා.

නිදහස් පක්ෂය ආරක්ෂා කරන්නේ මහින්ද රාජපක්ෂ මහත්තයාගේ පක්ෂයට එක්වෙලාලු. තුන් වතාවක් රාජපක්ෂ මැතිතුමා පක්ෂය විනාශ කරන්න හැදුවා. අපි ඒවා වැළැක්වූවා.”

මෙහිදී අදහස් දැක්වූ කුමාර වෙල්ගම මහතා සඳහන් කළේ තමාගේ ඡන්දය පොහොට්ටුව වෙනුවෙන් භාවිත නොකරන බවත් ඉතිරි අපෙක්ෂකයන් 34න් එක් අයෙකුට භාවිත කරන බවත්ය.

එසේම ශ්‍රී ලංකා නිදහස් පක්ෂය ආරක්ෂා කර ගැනීමට අවශ්‍ය නම් පොදුජන පෙරමුණට ඡන්දය දීමෙන් වැළකී සිටින ලෙසත් ඔහු සඳහන් කළේය.

Recommended For You

About the Author: Editor