අන්තවාදීන්ට සහ කුමන්ත්‍රණකරුවන්ට මාව බය කළ නොහැකියි – ජනාධිපති අවධාරණය කරයි

රට ගැන සිතන නායකයෙකු බලයට පත් සෑම අවස්ථාවකම එම වැඩපිළිවෙළ කඩාකප්පල් කිරීම කුමන්ත්‍රණකාරී සහ අන්තවාදී කණ්ඩායම්වල ඉලක්කය වූ බව  ජනාධිපතිවරයා පෙන්වා දුන්නේය.

බාධක පැමිණිය ද දුප්පත්කම තුරන් කිරීමට ආරම්භ කළ ගමන නතර නොකරන බව ජනාධිපති ගෝඨාභය රාජපක්ෂ මහතා අවධාරණය කරයි. අතීතයේ දී ඇතැමෙකුට රැකියා ලැබුණද, දිළිඳු ජනතාවට අවස්ථාව නොලැබුණු බව ජනනාධිපතිවරයා පෙන්වා දෙයි.

“සෞභාග්‍යයේ දැක්ම” ප්‍රතිපත්ති ප්‍රකාශනයෙන් ජනතාවට දුන් පොරොන්දු ඒ අයුරින්ම ඉටු කරමින් මැතිවරණය අවසන් වූ වහාම අඩු ආදායම්ලාභීන් සහ උපාධිලාභීන් සඳහා සැලසුම් කළ රැකියා එක්ලක්ෂ පනස්දහස  දෙන බව රාජපක්ෂ මහතා සඳහන් කරයි. සාමාන්‍ය පෙළ සහ උසස් පෙළ සමතුන්ට පුහුණුවක් සමග රැකියා දීමට වැඩපිළිවෙළක් සකස් කරන බව ද ජනපතිවරයා කියා සිටී.

පොදුජන පෙරමුණෙන් මහ මැතිවරණයට තරග වැද සිටින අපේක්ෂකයන්ගේ ජය තහවුරු කරනු පිණිස අද (01) බදුල්ල දිස්ත්‍රික්කයේ චාරිකාවක නිරත ජනාධිපතිවරයා මහියංගනය මහවැලි ක්‍රීඩාංගණයේ පැවති ජන හමුවේ දී මේ බව සඳහන් කළේය.

අපේක්ෂක තේනුක විදානගම මහතා විසින් හමුව සංවිධාන කර තිබිණ.

රට ගැන සිතන නායකයෙකු බලයට පත් සෑම අවස්ථාවකම එම වැඩපිළිවෙළ කඩාකප්පල් කිරීම කුමන්ත්‍රණකාරී සහ අන්තවාදී කණ්ඩායම්වල ඉලක්කය වූ බව  ජනාධිපතිවරයා පෙන්වා දුන්නේය.

කිසිදු පදනමක් නැතිව වරාය ආශ්‍රිතව අර්බුදයක් නිර්මාණය කිරීමට පිරිසක් උත්සාහ කරමින් සිටිති. තමා බියපත් කිරීමට ඔවුනට නොහැකි බව සඳහන් කළ ජනාධිපතිවරයා දුප්පත්කම තුරන් කිරීමට ගෙන යන වැඩපිළිවෙල ආපසු හැරවීමට කිසිවෙකුටත් ඉඩ නොදෙන බව අවධාරණය කළේය.

අතරමග නතර වී ඇති මොරන් ඇල වාරි ව්‍යාපෘතිය කඩිනමින් නිම කර මහියංගනය ප්‍රදේශයේ පානීය ජල ගැටළුව විසඳන බව ජනාධිපතිවරයා පැවසීය. වන අලි තර්ජනය, මත්ද්‍රව්‍ය උවදුර සහ දෙහිගොල්ල මහා විද්‍යාලයේ  අඩු පාඩු පිළිබඳව රැස්ව සිටි ජනතාව ජනාධිපතිවරයා දැනුවත් කළහ.

ඩී.බී. ශෂිකලා සෙව්වන්දි දියණිය කොවිඩ් අරමුදල සඳහා තම මුදල් කැටය ජනාධිපතිවරයා වෙත පිරිනැමුවාය.

මහියංගනයට යන මග දෙපස රැස්ව සිටී ජනතාව සමග ද ජනාධිපතිවරයා සුහද කථා බහක නිරත විය.

අපේක්ෂිකා ඕෂධී හේවාමද්දුම මහත්මිය වියළුව කන්දකැටිය සතිපොළ භූමියේ සංවිධාන කළ ජන හමුවට සහභාගී වූ ජනාධිපතිවරයාට ජනතාව මහත් හරසර පුද කළහ.

බොහෝ  දිස්ත්‍රික්කවල පවතින  වගා ජල හිඟයට සහ වන අලි තර්ජනයට ස්ථීර සාර විසඳුම් සෙවීමට විධිමත් වැඩපිළිවෙළක් සකස් කරන බව  ජනාධිපතිවරයා කියා සිටියේය. පාරම්පරික වගා බිම් යළි පවරා අස්වැද්දීමට පියවර ගන්නා බව ද රාජපක්ෂ මැතිතුමා සඳහන් කළේය.

සියලු ගැටළු අධ්‍යයන කර විධිවත් වැඩපිළිවෙළක් යටතේ දිළිඳුකම පිටුදැක, ජනතාව ජීවත් කරවීමේ වගකීම ඉටුකරන බව  ජනපතිවරයා පැවසීය.

අපේක්ෂක ඩිලාන් පෙරේරා මහතා වියළුව, මීගහකිවුල, පොළභූමිය අසළ සංවිධාන කළ ජන හමුවට සහභාගී වූ ජනාධිපතිතුමා රැස්ව සිටී ජනතාව සමග සුහද කථා බහක නිරත වෙමින් ප්‍රදේශයේ ගැටළු විමසීය.

ඇල්ලන්ද මාර්ගය පිළිසකර කර බස්රථයක් ධාවනයට යොදවන ලෙස මීගහකිවුල ජාතික පාසලේ දියණියක කළ ඉල්ලීම ජනාධිපතිතුමාගේ අවධානය යොමු විය. එය සටහන් කර ගන්නා ලෙස නිලධාරිනට දැනුම් දෙනු ලැබීය.

පුරන්ව ඇති අක්කර 3,000ක පමණ කුඹුරු අස්වැද්දීමට හැකි අයුරින් ලොග්ගල ඔය හරවා දෙන්නැයි ජනතාව ජනාධිපතිතුමාගෙන් ඉල්ලා සිටියහ.

මීගහකිවුල ජාතික පාසලේ උසස් පෙළ ගුරු හිගය සහ අඩු පාඩු පිළිබදව ජනාධිපතිතුමා දැනුවත් කෙරිණ.

ක්‍රීඩාංගණය සහ ගුරු නිවාසය ඉදිකර දෙන ලෙස ඌව පරණගම ලූණුවත්ත ජාතික පාසලට පැමිණි ජනාධිපතිතුමාගෙන් විදුහල්පතිතුමා සහ සිසුහු ඉල්ලා සිටියහ.

අල ගොවීන් වගාව සඳහා දිරිමත් කළ ජනාධිපතිතුමා බදුල්ල බීජ පර්යේෂණ ආයතනය ගුණාත්මක බීජ අර්තාපල් පිළිබඳ පර්යේෂණ කරමින් තිබෙන බව සඳහන් කළේය.

අපේක්ෂක චාමික බුද්ධදාස මහතා ඌව පරණගම අඹගස්දෝව ප්‍රාදේශීය සභා ක්‍රීඩාංගණයේ සහ අපේක්ෂක සම්පත් ජයසුන්දර මහතා වැලිමඩ ප්‍රාදේශීය සභා සතිපොළ භූමියේ සංවිධාන කළ ජනහමුවලට සහභාගී වූ ජනාධිපතිතුමා රැස්ව සිටි පිරිස සමග සුහද කථා බහක නිරත විය.

ප්‍රදේශයේ ව්‍යාපාරික සහ සෙසු ගැටළු පිළිබඳව ජනතාව ජනාධිපතිතුමා දැනුවත් කළහ. ලූණුවත්ත උඩපේරුව පදිංචි ගාමිණි කුමාරසිංහ මහතා විසින් නිෂ්පාදිත සැහැල්ලු කොල මඩින යන්ත්‍රය පිළිබඳව ජනාධිපතිතුමා දැනුවත් කෙරිණ.

වැලිමඩ විජය විද්‍යාලයේ මිහෙළි නිල්මිණි රත්නායක දියණිය කොවිඩ් අරමුදල සඳහා මුදල් කැටයක් ජනාධිපතිතුමා වෙත පරිත්‍යාග කළාය.

අපේක්ෂක සුදර්ශන දෙණිපිටිය මහතා බණ්ඩාරවෙල නගර සභා පරිශ්‍රයේ සහ අපේක්ෂක ජානක තිස්සකුටිට්ආරච්චි මහතා දියතලාව ප්‍රාදේශීය සභා ක්‍රීඩාංගණයේ සංවිධාන කළ ජන හමුවලට පැමිණි ජනාධිපතිතුමාට ජනතාව මහත් හරසර පුද කළහ.

වගා වන්දි ප්‍රදානය ක්‍රමවත් කිරීමට සහ වගා අස්වැන්න සුරක්ෂිතව ප්‍රවාහනයට විධිමත් වැඩපිළිවෙළක් සකස් කිරීමේ අවශ්‍යතාව පිළිබඳව ජනාධිපතිතුමා දැනුවත් කෙරිණ.

Recommended For You

About the Author: Editor