නුවරඑළිය SJB අපේක්ෂිකා ‘නීතිඥ හිරන්‍යා හේරත්’ පාර්ලිමේන්තුවට තෝරාපත් කර යැවිය යුතුමය

දශක ගණනාවකට පසු නුවරඑළියෙන් ජාතික දේශපාලනයට පිවිසි එකම කාන්තා නියෝජනය වන හිරන්‍යා හේරත් මහත්මිය අප වෙනුවෙන්… අපේ දරුවන් වෙනුවෙන් වැඩිම මනාපයෙන් පාර්ලිමේන්තුවට පත්කර යැවීම අද නුවරඑළියේ ජනතාව වන අප හමුවේ ඇති ඓතිහාසික වගකීමකි. යුතුකමකි.

රටට ප්‍රජාතන්ත්‍රවාදය ද? ඒකාධිපතිවාදය ද ? නුවරඑළියට සංවර්ධනය ද ? නැතහොත් පරණ සුපුරුදු සූරා කෑම ද ? විකල්පය තෝරා ගැනීමට තවත් ඇත්තේ දින කිහිපයකි. එනිසා මේ තීරණාත්මක අවස්ථාවේ නුවරඑළියේ බුද්ධිමත් ඡන්දදායකයින්ගෙන් විශේෂ ඉල්ලීමක් කළ යුතුය.

ඒ මෙවර මහ මැතිවරණයේදී නුවරඑළියේ සාම්ප්‍රදායික අන්ත දූෂිත ප්‍රභු පවුල් පාලනයට අභියෝග කරමින් ජනතාව අතරින්, ජනතාව වෙනුවෙන් ඉදිරිපත්ව සිටින සමගි ජන බලවේගයේ අපේක්ෂිකා නීතිඥ හිරන්‍යා හේරත් මහත්මිය වෙනුවෙන් නොව නුවරඑළියේ ජීවත් වන, එයට ආදරය කරන ඔබ මා වෙනුවෙනි.

පසුගිය 70 වසරක දේශපාලන ඉතිහාසය පුරා නුවරඑළිය දිස්ත්‍රික්කයෙන් කැබිනට් ඇමතිවරු, ඇමැතිවරු, නියෝජ්‍ය ඇමැතිවරු සහ මන්ත්‍රීවරු සිය ගණනක් බිහි වුවත් අදත් ලංකාවේ තිබෙන පසුගාමී දිස්ත්‍රික්ක අතරින් නුවරඑළිය ඉදිරියෙන්ම සිටින බව ඔබ හොදින් දන්නා කරුණකි. ඒ සදඑා හොදම උදාහරණ සෞඛ්‍ය සේවයයි. අන්ත දුප්පත් වතුකම්කරු සහ ගොවි ජනතාවක් වෙසෙන නුවරඑළිය යනු අඩුම වෛද්‍යවරුන් පිරිසක් සේවය කරන දිස්ත්‍රික්කයයි.

අධ්‍යාපනය, ක්‍රීඩා, කෘෂිකර්මාන්තය, වැවිලි කර්මාන්ත සහ රාජ්‍ය සේවය අතින් ගත් විට ද තත්ත්වය සෞඛ්‍යට දෙවැනි නැත. නුවරඑළියේ පාසල් බහුතරකට පුහුණු ගුරුවරුන් හා විදුහල්පතිවරුන් නොමැති අතර භෞතික සම්පත් හිගය ගැන කතා කිරීමට දෙයක් නැත.

ක්‍රීඩා ඇමැතිවරු තිදෙනක් පත් කළ දිස්ත්‍රික්කයක් වුවත් නුවරඑළියේ දරුවන්ට ක්‍රීඩා කළ හැකි ක්‍රීඩාංගනයක් නැත. නුවරඑළියෙන් ජාතික තලයට ගිය ක්‍රීඩකයෙක් – ක්‍රීඩිකාවක් නැත.

වැවිලි කර්මාන්ත අමාත්‍යාංශය, වතු යටිතල පහසුකම් අමාත්‍යාංශය පසුගිය කාලය පුරාම නුවරඑළියට සින්න වූ අමාත්‍යධුර විය. එහෙත් අදත් වතු කම්කරු ජනතාවගෙන් අති බහුතර ජීවත් වන්නේ කිසිදු පහසුකමක් නැති පේලි නිවාසවලය. ඔවුන්ට කියා බිම් අගලක් නැත.

ඔවුන් තම දෛනික වැටපු වැඩි කර ගැනීමට කළ සියලු අරගල නුවරඑළියේ දේශපාලන ප්‍රබලයින් විසින් පවාදී ඇත. එනිසා අදත් නුවරඑළියේ වතු ජනතාව යනු අඩුම දෛනික වැටුපක් ලබන දැවැන්තම සූරා කෑමට ලක්ව සිටින කණ්ඩායමයි.

එළවළු, අල, මල් වගාව පදනම් කරගත් නුවරඑළියේ ගොවි ජනතාව ද මුහුණ දෙන්නේ මීට දෙන්නේ මීට නොවෙනස් තත්ත්වයකටය. ඔවුන්ගේ නිෂ්පාදන සදහා විධිමත් වෙළෙදපොළක්, සාධාරණ මිලක් ලබා දීමට පසුගිය 70 වසර පුරා බලයට පත් කිසිදු ප්‍රභූ දේශපාලනඥයෙක් පියවර ගත්තේ නැත. එනිසා අදත් නුවරඑළියේ ගොවිජනතාව අතරින් බහුතරය අන්ත දිළින්දෝය.

නුවරඑළියේ උගත් තරුණ – තරුණියන්ට පසුගිය කාලය පුරා රජයේ රැකියාවක් ලැබුණේ නැත. නුවරඑළියෙන් පත්ව ගිය ප්‍රභූ දේශපාලනඥයින් ඒවා මිලදට විකුණා දමා හෝ තම හිතමිතුරන් අතර බෙදා දී තම මඩිය තරකර ගත්තා පමණකි. ඇතැම් රජයේ රැකියා ලබාදීමට තරුණියන්ගෙන් ලිංගික අල්ලස් ගත් බව ද ප්‍රකට කරුණකි.

මේ අතර නුවරඑළියෙන් බිහි වූ අල්පයක් වූ විද්වතුන්ට, වෘත්තිකයින්ට රජයේ ඉහළ තනතුරු ලැබුණේ ද නැත. ඒවා ප්‍රභූ දේශපාලනඥයින්ගේ පවුලේ ඥාතීන් හෝ මිතුරන් අතර බෙදා ගත් අතර ඔවුහු ඒවා කෙළිබිමක් බවට පත්කර ගත්හ. නුවරඑළියට කටුවක්වත් ලැබුණේ නැත. ලැබුණා නම් ඒ ලිංගික සූරාකෑම හෝ අල්ලසට රැකියා විකුණා දැමීම පමණකි.

කාන්තාවන්ට සිදුව ඇති අගතිය

නුවරඑළියේ අති බහුතරය කාන්තාවන්ය. වතුකරයේ, ගොවිබිමේ, වෙළෙදපොළේ, ගව පට්ටියේ ශ්‍රමය වගුරමින් දහසක් දුක් විදින්නේ මේ කාන්තාවන්ය. රටට විදේශ විනියමය, නුවරඑළියට ආදායම් ගෙන එන්නේ මේ කාන්තාවන්ය.

එහෙත් නුවරඑළියේ කාන්තාවන්ගේ තත්ත්වය අතිෂය නොදියුණුය. ඛේදවාචකයකි. ඔවුන්ට නිසි වැටුපක්, සෞඛ්‍ය පහසුකම්, ආදායම් තත්ත්වයක් හා ගරුත්වයක් නොව නිසි පවුල් ජීවිතයක් පවා ගත කිරීමට අවස්ථාවක් නැත.

වතු කම්කරු කතුන් සේම ගොවිබිම්වල ශ්‍රමය වැය කරන කාන්තාවන් ද අසීමිත සූරා කෑමට ලක්ව ඇති අතර ඔවුන් දෙස පසුගිය 70 වසර පුරා ප්‍රභූ දේශපාලනඥයින් ඇසක් ඇර බලා නැත. ඔවුන්ගේ ජීවන තත්ත්වය, ආර්ථික තත්ත්වය, සමාජ තත්ත්වය, සෞඛ්‍ය තත්ත්වය දියුණු කිරීමට කිසිදු දෙයක් කර නැත.

මේ නිසා අද නුවරඑළියේ අති බහුතරයක් කාන්තාවන් ක්ෂුදු මූල්‍ය මාෆියාවේ ගොදුරු බවට පත්ව ඇත. ණයකාරියන් බවට පත්ව ඇත.

නුවරඑළිය පුරා අසීමිතය මත්ද්‍රව්‍ය භාවිතය ඉහළ යාම නිසා ඔවුන්ගේ සැමියන්, දරුවන් විනාශ වී ඇති අතර පවුල් ජීවිත අවුල් වී ඇත. අනාගතය අදුරු වී ඇත.

කොටින්ම නුවරඑළියේ කාන්තාවන් සරණක් අහිමි, පිළිසරණයක් අහිමි පිරිසක් බවට පත්ව ඇත.

මේ යුගය වෙනස් කළ යුතුමය

ලෝකය වෙනස් වෙමින් පවතී. එනිසා නුවරඑළියේ අපි ද මේ දූෂිත ප්‍රභූ පවුල් පාලනය පරාජය කර අලුත් දේශපාලන නායකත්වයක් පත් කළ යුතුමය.

රේණුකා හේරත් මහත්මිය අමාත්‍යධුරයට පත් පත් වීමෙන් පසුව නුවරඑළියෙන් කාන්තා නියෝජනයක් සිදුව නැත. අප විසින් සිදුකර ඇති බරපතළම වරදක් ලෙස එය සැලකිය හැකිය. දිසානායක – තොණ්ඩමන් ප්‍රභූ පවුල් පාලනයට යටව අන්ත දුක් වින්දා මිස අප ඒ දූෂිත ප්‍රභූ පවුල් පාලනය වෙනස් කිරීමට කිසිවක් කළේ නැත.

එනිසා මෙම මහ මැතිවරණයේදී අප විසින් තීරණාත්මක තීන්දුවක් ගත යුතුය. ඒ අප වෙනුවෙන්, අපේ දරුවන් වෙනුවෙන් පමණක් නොව සමස්ත රටත් – ජාතියත් වෙනුවෙනි.

ඒ වෙනස කළ හැක්කේ අපිට හිතවත්, අපි අතරින්ම බිහි වූ ‘අපේම කෙනෙක් පාර්ලිමේන්තුවට තෝරා පත්කර යැවීම මගිනි.

වසර ගණනාවකට පසු, නුවරඑළියේ පොදුජනතාව වෙනුවෙන් අනුපමේය සේවයක් කළ හිටපු ඇමතිනී රේණුකා හේරත් මැතිණිය දේශපාලනයෙන් හා දිවි ගමනින් සමුගත් පසු අපට දෛවෝපගත ලෙස ඒ ස්වර්ණමය අවස්ථාව උදාවී ඇත. ඒ රේණුකා හේරත් මැතිණියගේ දියණිය නීතිඥ හිරන්‍යා හේරත් මහත්මියගේ දේශපාලන ආගමනය සමගිනි.

ඇය පසුගිය කාලය පුරා සිය මවගේ සෙවනැල්ල සේ කටයුතු කරමින් අපේ දුක – සැප, අවශ්‍යතා මනාව හදුනාගත් අපේම හිතවතියකි… මිතුරියකි… ඥාතිවරියකි… දියණියකි. ඒ නිසා ඇය ගැන දෙවරක් සිතීමට අවශ්‍යතාවක් නැත. නුවඑරළියෙන් බිහි වූ කීර්තිමත්ම දේශපාලනඥවරිය වන රේණුකා හේරත් මැතිණිය ගත් ඒ මග ඇය විසින් ද අනුගමනය කරන බව පැහැදිලිය. ඇය තම මව ආරම්භ කළ ගමන අවසානයක් කරා ගෙන යනු ඇත.

ඒ නිසා දශක ගණනාවකට පසු නුවරඑළියෙන් ජාතික දේශපාලනයට පිවිසි එකම කාන්තා නියෝජනය වන හිරන්‍යා හේරත් මහත්මිය අප වෙනුවෙන්… අපේ දරුවන් වෙනුවෙන් වැඩිම මනාපයෙන් පාර්ලිමේන්තුවට පත්කර යැවීම අද නුවරඑළියේ ජනතාව වන අප හමුවේ ඇති ඓතිහාසික වගකීමකි. යුතුකමකි.

දෙවරක් නොසිතන්න. සමගි ජන බලවේගයේ නුවරඑළිය දිස්ත්‍රික් අපේක්ෂිකා නීතිඥ හිරන්‍යා හේරත් මහත්මිය වෙනුවෙන් අපේ වටිනා මනාපය සලකුණු කර ඒ ජාතික වගකීම ඉටුකරමු.

මම, තීක්ෂණ බණ්ඩාර කරල්ලියැද්ද

Recommended For You

About the Author: Editor