පාවා දුන් අයට ඡන්දය දෙන්න එපා – ඇමති ප්‍රසන්න රණතුංග ඉල්ලයි

මහින්ද අතනොහැරි ඔරිජිනල් පොහොට්ටුවාදීන්ගේ ආණ්ඩුවක් අගෝස්තු 06 වෙනිදා පිහිටුවනවා.

පරාජයක දී මහින්ද අත නොහැර ගිය ඔරිජිනල් පොහොට්ටුකරුවන්ගෙන් සමන්විත තුනෙන් දෙකක බලයක් සහිත ආණ්ඩුවක් අගෝස්තු 06 වෙනිදා පිහිටුවන  බව කාර්මික අපනයන, ආයෝජන ප්‍රවර්ධන, සංචාරක හා ගුවන්සේවා ඇමති ප්‍රසන්න රණතුංග මහතා අවධාරණය කරයි.

ගෝඨාභය රාජපක්ෂ – මහින්ද රාජපක්ෂ සුසංයෝගයෙන් රට ගොඩ නගා වැඩපිළිවෙල පාවා දෙන්නන් අවශ්‍ය නැති බව පැවසූ රණතුංග මහතා අගෝස්තු 05 වෙනිදා උදෑසනම ඡන්ද පොළට පැමිණ මහින්ද අත නොහැරි අය වෙනුවෙන් පමණක් ඡන්දය භාවිතා කරන්න යැයි ඉල්ලා සිටියේය.

කැලණිය ඊරියවැටිය ප්‍රදේශයේ අද (02) පැවැති ශ්‍රී ලංකා පොදුජන පෙරමුණේ අවසන් රැලියේදී ඇමතිවරයා මේ බව සඳහන් කළේය.

මෙහිදී වැඩිදුරටත් අදහස් දැක්වූ ප්‍රසන්න රණතුංග මහතා මෙසේද කීවේය.

“පසුගිය යහපාලනය මේ රටට කරපු විනාශය මෙතෙකැයි කියා නිම කල නොහැකියි. යහපාලනයක් නෙමෙයි ඒ කාලේ තිබුණේ ජඩ පාලනයක් . යූ.එන්.පී. එකයි, ශ්‍රී ලංකා එකයි, ජේ.වි.පී. එකයි, ටී.එන්.ඒ.එකයි, මුස්ලිම් අන්තවාදී පක්ෂයි ඔක්කොම එකතු කරගෙන මේ රට කාබාසිනිය කරලා දැම්මා. මහ බැංකුව මංකොල්ල කෑවා. ජාතික සම්පත් විකුණුවා. කුඩු හා පාතාලය හිස එසෙව්වා. රණවිරුවෝ, බුද්ධි අංශ හිරේ දැම්මා. හාමුදුරුවරුන්ට හිරි හැර කලා. ජාතික ආරක්ෂාව බිඳ වැට්ටුවා. පාස්කු ප්‍රහාරය වෙනකම් ඇස් කන් පියාගෙන හිටියා. කොටින්ම මේ රට විසාලාවක් කලා. රනිල් -මෛත්‍රි – සජිත් ඇතුලු මුළු යහපාලන නඩයම මේකට වගකියන්න ඕනෑ. එදා යහපාලන නඩය මහින්ද මහත්තයාට විරුද්ධව බොරු කියලා ජනතාව නොමග යවලා තමයි බලයට ආවේ. දැන් මේ අය දෙකට බෙදිලත් ආයෙත් ජනතාවට බොරු කියන්න පටන් අරන්. රනිල්ලාගේ – සජිත්ලාගේ බොරු වලට මේ රටේ ජනතාව රැවටුනු කාලේ දැන් ඉවරයි. මෙරට ඉතිහාසයේ බිහිවුණු දූෂිතම අසාර්ථකම ආණ්ඩුව රනිල්-මෛත්‍රී-සජිත් ගේ යහපාලන ආණ්ඩුවයි.

පසුගිය ජනාධිපතිවරණයේදී මේ රටේ ජනතාව ගෝඨාභය රාජපක්ෂ මහතාට බලය දුන්නේ බලාපොරොත්තු හුඟක් ඇතිව. විපක්ෂයේ කකුලෙන් ඇදීම්, බාධා කිරීම් මැදයි අපිට ඒවා ඉටුකරගන්න සිදුවුනේ. අගෝස්තු 05 වෙනිදාට රට තුල පොහොට්ටුවේ ස්ථාවර ආණ්ඩුවක් පිහිටුවා ගත්තොත් එදා ගෝඨාභය රාජපක්ෂ මහතාට ලබාදුන් ජනවරමේ අපේක්ෂාවන් ඉටු කිරීමට අපිට හැකි වෙනවා. අපි තුනෙන් දෙකේ බහුතර බලයක් ඉල්ලන්නේ රනිල් – මෛත්‍රී ආණ්ඩුව ගෙන ආ රටට අහිතකර අණපනත් සම්පූර්ණයෙන්ම අහෝසි කරන්නයි. ඒකට අපි ලෑස්තියි.

මෛත්‍රීපාල සිරිසේන හිටපු ජනාධිපතිවරයා ශ්‍රී ලංකා නිදහස් පක්ෂය අලියාගේ නැට්ටේ ගැට ගැහුවා. කිව්වෙ නම් පාක්ෂිකයෝ රැකගන්න කියලයි. පහුගිය යහපාලනය නිසා ගොඩගිය එක ශ්‍රී ලංකාකාරයෙක් ගැන පුළුවන් නම් කියන්න. යහපාලන ආණ්ඩුව කාලේ රනිල්ගේ මෛත්‍රීගේ යහපාලන ආණ්ඩුවේ කටු සූප්පු කරපු අය අහිංසක පාක්ෂිකයා රැක්කද? නෑ…

අපි පොහොට්ටුව හැදුවේ ඔරිජිනල් ශ්‍රී ලංකාකාරයන්ගෙන්. පොහොට්ටුවේ තමයි ශ්‍රී ලංකා නිදහස් පක්ෂයේ ප්‍රතිපත්ති බණ්ඩාරනායක ප්‍රතිපත්ති තියෙන්නේ. අලියාට මුක්කු ගහපු මෛත්‍රී ගාව නෙමෙයි. ඒ නිසා මේ පාර ජන්දය දෙනකොට ජනවරම පාවා නොදෙන, මහින්ද හැර නොයෙන ඔරිජිනල් පොහොට්ටුකාරයෝ විතරක් පාර්ලිමේන්තුවට එවන්න. එහෙම නොවුනොත් ගෝඨාභය රාජපක්ෂ මහතාගේ වැඩපිළිවෙල ඉදිරියට ගෙන යන්න බාධා එන්න පුළුවන්.

එක්සත් ජාතික පක්ෂය සමඟ දීග කාපු අය සත පහකට විශ්වාස කරන්න බෑ. ඒ අය නැවත එහෙම නොකරාවි යැයි අපිට සහතිකයක් නෑ. ඒ නිසා ඔබ ඇත්තටම රටට ආදරය කරනවා නම් ජනවරම පාවා නොදෙන , තනතුරු වරප්‍රසාද වරදාන වලට යට නොවෙන අය පාර්ලිමේන්තු එවන්න. ජනවරම පාවාදෙන, තනතුරු වරදාන වරප්‍රසාද වලට ප්‍රතිපත්ති පාවාදෙන උදවිය මතක ඇතිව ගෙදර යවන්න.    

Recommended For You

About the Author: Editor