ටයිල් සහ සනීපාරක්ෂක නිෂ්පාදන ආනයන තහනම ගැන TSIA දැඩි අවධානය

ටයිල් සහ සනීපාරක්ෂක නිෂ්පාදන ආනයන තහනම මගින් පාරිභෝගිකයින්ට හා රටේ ආදායමට අහිතකර බලපෑමක් එල්ල විය හැකියි – ටයිල් හා සනීපාරක්ෂක නිෂ්පාදන ආනයනකරුවන්ගේ සංගමය පවසයි

ටයිල් හා සනීපාරක්ෂක නිෂ්පාදන ආනයනකරුවන්ගේ ගැටලු විසඳීමේ අරමුණින්, පිහිටුවන ලද ශ්‍රී ලංකාවේ ප්‍රධාන ආයතනය වන ටයිල් හා සනීපාරක්ෂක ආනයනකරුවන්ගේ සංගමය (TSIA), රජය විසින් ටයිල් හා සනීපාරක්ෂක නිෂ්පාදන ආනයනය තාවකාලිකව අත්හිටුවීමට පසුගියදා ගත් තීරණය පිළිබඳව බරපතල අවධානය යොමු කර තිබේ.

ඒ පිළිබඳව කණස්සල්ලට පත්වන එම සංගමය, එම නිෂ්පාදන ආනයනය කිරීම තහනම් කිරීම, රට තුළ විනිමය විදේශයට ගලා යාම අවම කිරීමේ රජයේ පියවර කෙරෙහි අහිතකර ලෙස බලපාන ආකාරයද පැහැදිළි කරයි.

ශ්‍රී ලංකාවේ ආනයනකරුවන් 300 කට අධික පිරිසකගෙන් සැදුම්ලත් ටයිල් හා සනීපාරක්ෂක නිෂ්පාදන ආනයනකරුවන්ගේ සංගමයේ සිටිනා ආනයනකරුවන්ගෙන් බහුතරයක් වසර 30 කට අධික කාලයක් රටට බදු ආදායමක් හිමි කර දෙමින්  ආර්ථිකයට සුවිශාල දායකත්වයක් දක්වා තිබේ. ඒ අනුව වාර්ෂිකව බිලියන 12 ක බදු ආදායමක් හිමිකර දෙමින්, දහස් ගණනකට රැකියා අවස්ථා සලසමින්, දේශීය ගනුදෙනුකරුවන් සඳහා හොඳම විකල්ප ඇතුළුව තවත් බොහෝ ප්‍රතිලාභ හිමි කර දෙමින්, මෙම ටයිල් ආනයන කර්මාන්තය දිවයින පුරා පුද්ගලයින් 50,000 කට පමණ සෘජු හා වක්‍ර රැකියා සපයයි. සංගමය සතු 300 කට අධික සාමාජිකයින් විසින් දිවයින පුරා වෙළෙන්දන් දෙදහසකට අධික සංඛ්‍යාවක් පත් කර ඇති අතර, රටපුරා ව්‍යවසායකයින් බිහිකිරීමට මෙන්ම, විවිධ ප්‍රදේශවල ග්‍රාමීය ක්ෂුද්‍ර ආර්ථිකයන් වර්ධනය කිරීමට කටයුතු කර තිබේ.

ටයිල්ස් සහ සනීපාරක්ෂක නිෂ්පාදන ආනයනය තාවකාලික අත්හිටුවීම මගින් ගබඩා සහ භාණ්ඩ ප්‍රවාහනය, නිෂ්කාෂණය සහ යැවීම, බැංකු හා මූල්‍ය, ඉදිකිරීම් සහ දේපළ වෙළඳාම් වැනි සහායක කර්මාන්තවලට සුවිශාල බලපෑමක් එල්ල වනු ඇති බවට, ටයිල් හා සනීපාරක්ෂක ආනයනකරුවන්ගේ සංගමය පෙන්වා දෙයි. එම ක්‍රියාමාර්ගය හේතුවෙන් විශේෂයෙන් ගෘහ නිර්මාණ ශිල්පීන්, ඉංජිනේරුවන්, උපදේශකයින්, ප්‍රමාණ මිනින්දෝරුවන්, උප කොන්ත්‍රාත්කරුවන්, ටයිල් පෙදරේරුවන් මෙන්ම දෛනික වැටුප් උපයන්නන් වැනි විශාල පිරිසකට රැකියා අහිමි වීමේ අවදානම ඉහළ යාමට ඉඩ තිබේ. ටයිල් හා සනීපාරක්ෂක ආනයනකරුවන්ගේ සංගමයෙහි සාමාජිකයන් සතුව සාමාන්‍යයෙන් වර්ග අඩි මිලියන 2 ක පමණ ගබඩා ඉඩකඩ හා වර්ග අඩි 200,000 ක ප්‍රදර්ශනාගාර ඉඩකඩ පවතින අතර, එමගින් රටේ දේපළ වෙළෙඳාම් ආදායම වර්ධනය කිරීමදට දායක වේ. එබැවින් මෙම ආනයන සීමා කිරීමේ ක්‍රියාමාර්ගය දිවයින පුරා ඇති ගබඩා සහ ප්‍රදර්ශනාගාර හිමිකරුවන් උපයන ආදායම කෙරෙහිද අහිතකර ලෙස බලපෑමට ඉඩ තිබේ.

මේ පිළිබඳව අදහස් දක්වමින්, ටයිල් හා සනීපාරක්ෂක ආනයනකරුවන්ගේ සංගමයෙහි සභාපති,‍් කාමිල් හුසේන් මහතා සඳහන් කළේ මෙවැන්නකි.

“අද වන විට මෙම නිෂ්පාදන සම්බන්ධයෙන් පවතින ඉල්ලුම සපුරාලීමට තරම් ප්‍රමාණවත් දේශීය නිෂ්පාදන තවමත් වෙළෙඳ පොළේ නැහැ. ඒ නිසා මෙම තීරණය, නිෂ්පාදනවල මිල ඉහළ යාමට පමණක් බලපාන කාරණයක් නොවෙයි. එය ගෘහස්ත පාරිභෝගිකයින්ට මෙන්ම අමුද්‍රව්‍ය නොමැති වීම නිසා නියමිත කාලයට භාරගත් වැඩ අවසන් කිරීමට නොහැකි වීමෙන් සමස්ත ඉදිකිරීම් ක්ෂේත්‍රයටම අහිතකර ලෙස බලපාන කාරණයක් වී තිබෙනවා. ටයිල් හා සනීපාරක්ෂක නිෂ්පාදන ආනයනකරුවන් එම නිෂ්පාදන සඳහා පැනවෙන බදු ප්‍රමාණයෙන් 100% ක්ම ගෙවමින් ආර්ථිකයට දායක වුණත්, ශ්‍රී ලාංකීය වෙළෙඳ පොළෙන් 50 % ක ප්‍රමාණයක් පමණයි අපේ නිෂ්පාදනවලට ඉඩ තිබෙන්නෙ. ඒ අතරම, පක්ෂපාතී ක්‍රමවේද මගින් උපරිම ප්‍රයෝජන ගැනීමට දේශීය නිෂ්පාදකයින්ට ඉඩ සලසමින් රජයේ ටෙන්ඩර් සියල්ලම ඔවුන්ට හිමි වෙනවා. විනිමය විදේශයට ගලා යාම අවම කිරීමේ රජයේ අවශ්‍යතාවය පිළිබඳව අප තේරුම් අරගෙන තිබෙනවා, තොරතුරු මගින් අපි පෙන්වා දෙන සමස්ත ක්‍රියාදාමය පිළිබඳව සලකා බැලුවොත්, මෙම නිෂ්පාදනය සම්බන්ධයෙන් රටට කිසිදු ප්‍රතිලාභයක් අත් නොවන බවත්, ඉන් සිදුවන හානිය සමස්ත රටටම බලපාන බවත් පැහැදිලිවම පෙන්නුම් කරනවා.”

ශ්‍රී ලංකාවේ ටයිල් හා සනීපාරක්ෂක නිෂ්පාදන වෙනුවෙන් ආයෝජනය කිරීමට ප්‍රධාන පෙළේ ජාත්‍යන්තර සමාගම්  ගෙන්වා ගැනීමට තම සංගමයේ සාමාජිකයින්ට හැකි බව ටයිල් හා සනීපාරක්ෂක ආනයනකරුවන්ගේ සංගමය (TSIA) ප්‍රකාශ කරයි. එහෙත් දුර්වල ආයෝජන ප්‍රතිලාභ ළඟා කර දෙමින්, රට තුළ පවතින ආයෝජන පරිසරය එවැනි කිසිදු සමාගමකට මෙරට මෙහෙයුම් කටයුතු ආරම්භ කිරීමට හිතකර තත්ත්වයක් උදා කරන්නේ නැත. දේශීය නිෂ්පාදන සඳහා වන ඉහළ බලශක්ති පිරිවැය මෙන්ම, කුඩා ප්‍රමාණයේ වෙළෙඳ පොළ හේතුවෙන් එවැනි ආයෝජන ඵල රහිත වී තිබේ. එබැවින් දේශීයව නිශ්පාදනය කිරීමට වඩා ආනයනය කිරීම සැළකිය යුතු අන්දමින් ලාභදායී වන අතර වඩාත් ගුණාත්‍මක හා මාදිලි රැසකින් සැපයිය හැකි බව එම සංගමය පවසයි.මේ වන විට ආනයනික නිෂ්පාදන වෙළෙඳ පොළේ නොමැතිකම හේතුවෙන්,‍ නිෂ්පාදකයින් විසින් නිෂ්පාදන මිල ගණන් ඉහළ නංවා ඇති පසුබිමක, ආනයන තහනම ඉවත් කරමින් දේශීය ඉදිකිරීම් ක්ෂේත්‍රයට සහන සැලසීම අවශ්‍යතාවක් බවද සංගමය පෙන්වා දෙයි.

“ටයිල් හා සනීපාරක්ෂක උපකරණ නිෂ්පාදනය සඳහා සැලකිය යුතු ශක්තියක් අවශ්‍ය බව පැහැදිලි කරාරණයක්. ඇත්ත වශයෙන්ම, පිරිවැය අවශ්‍යතාව අතින් දේශීය නිෂ්පාදන සඳහා වැයවන පිරිවැය ඒ මට්ටමේ හෝ ඊටත් වඩා ගුණාත්මකභාවයෙන් ඉහළ ආනයනය කළ නිෂ්පාදන සඳහා වැය වන පිරිවැය වගේ දෙගුණයක් පමණ වෙනවා. ඒ වගේම නිෂ්පාදන ක්‍රියාවලිය අතරතුර දූවිලි අංශු, ඊයම් හා ෆ්ලෝරීන් අඩංගු වායුමය අපද්‍රව්‍ය විමෝචනය වීම නිසා එය පරිසරයටත් හානිකරයි. එබැවින් මෙය ශ්‍රී ලංකාව වැනි පරිසර හිතකාමී රටකට නොගැලපෙන ඉහළම පරිසර දූෂණයක් සහිත කර්මාන්තයක්  නිසා දේශීය කර්මාන්තයක් ලෙසින් අඩුම ප්‍රමුඛතාව ලබා දිය යුතු කර්මාන්තයක් හැටියට සඳහන් කරන්න පුළුවන්.” සංගමයේ ලේකම් අර්වින් බුලත්සිංහල මහතා එලෙස සඳහන් කළේය.

“විදෙස් සැපයුම්කරුවන් දිගුකාලීන සබඳතා ඉහළ නංවමින් මේ වන විටත් අපි සාකච්ඡා පවත්වා ඇති තිබෙනවා. පවතින තත්ත්වය යටතේ විදේශ මුදල් පීඩනය ලිහිල් කිරීම සඳහා දීර්ඝ ණය කාල සීමාවක් පිරි නමමින් රටට සහයෝගය දැක්වීමට අපගේ සැපයුම්කරුවන් සූදානම් බව ප්‍රකාශ කිරීමට සතුටුයි. එවැනි තත්වයක් සැලකිල්ලට ගෙන, ටයිල් හා සනීපාරක්ෂක උපකරණ ආනයනය කිරීම සඳහා පනවා ඇති තාවකාලික අත්හිටුවීම ඉවත් කරන ලෙස අපි ඉතා නිහතමානීව රජයෙන් ඉල්ලා සිටනවා. පනවා ඇති මෙම තහනම ඉවත් කිරීමෙන් රට පුරා සිටින දහස් ගණනකගේ ජීවනෝපායන් ආරක්ෂා වෙනවා වගේම, ඒ හේතුවෙන් මෙවැනි අසීරු කාල සීමාවක ඔවුන්ට අනාගතය පිළිබඳ  පිළිබඳ බලාපොරොත්තුවක් ද ඉතිරි වෙනවා.” ඔහු වැඩිදුරටත් සඳහන් කළේය.

Recommended For You

About the Author: Editor