බේරූට් පිපිරීම: එක්සත් ජාතීන් ‘ලෙබනනයේ මානුෂීය අර්බුදය’ ගැන අනතුරු අඟවයි

පසුගිය අඟහරුවාදා බ්රූට්හි සිදු වූ විනාශකාරී පිපිරීමෙන් පසු එක්සත් ජාතීන් ලෙබනනයේ මානුෂීය අර්බුදයක් ගැන අනතුරු අඟවා තිබේ. පිපිරීමට පෙරත් ලෙබනනය විශාල ආර්ථික පසුබෑමකට ලක්ව සිටියේය.

බේරූට් වරාය පරිශ්‍රෙය් සිදු වූ දැවැන්ත පිපිරීමෙන් අවම වශයෙන් පුද්ගලයින් 154 ක් මියගොස් 5,000 ක් තුවාල ලබා 300,000 ක් නිවාස අහිමි විය.

ලෝක ආහාර වැඩසටහන පැවසුවේ බේරූට් වරායට සිදු වූ හානිය ආහාර සැපයුමට බාධාවක් වන අතර ඒ සමග ආහාර මිල ඉහළ යනු ඇති බවයි.

මේ අතර, ලෙබනනයේ ජනාධිපතිවරයා පිපිරීම පිළිබඳ ජාත්‍යන්තර පරීක්ෂණයක් ප්‍රතික්ෂේප කළ අතර, එය බෝම්බයක් මගින් අවුලුවනු ලැබුවේ දැයි නිලධාරීන් සොයා බලන බව පැවසීය.

“හේතුව තවමත් නිශ්චය කර නොමැත. රොකට්ටුවක් හෝ බෝම්බයක් හෝ වෙනත් ක්‍රියාවක් හරහා බාහිර මැදිහත්වීමේ හැකියාවක් පවතී,” මයිකල් අවුන් පැවසීය.

වරාය ගබඩාවක අනාරක්ෂිතව ගබඩා කර තිබූ ඇමෝනියම් නයිට්රේට් ටොන් 2,750 ක් පුපුරා යාමේ ප්‍රතිඵලයක් ලෙස මෙම පිපිරීම සිදුව ඇති බව අවුන් මහතා මීට පෙර පවසා තිබේ.

බේරූට් හි පිපිරුම් ස්ථානය පෙන්වන සිතියම

අඟහරුවාදා පිපිරීමට පෙර ලෙබනනයේ ජනගහනයෙන් 75% කට ආධාර අවශ්‍ය වූ අතර 33%කට රැකියා අහිමි විය. මිලියනයක ජනතාවක් දරිද්‍රතා රේඛාවට පහළින් ජීවත් වූහ.

ඩබ්ලිව්එෆ්පී ප්‍රකාශක එලිසබෙත් බයර්ස් සිකුරාදා ජිනීවා නුවරදී මාධ්‍යවේදීන් අමතමින් කියා සිටියේ බේරූට් වරායට දැඩි හානියක් සිදුවීම පිළිබඳව තම සංවිධානය සැලකිලිමත් වන බවයි.

පස් දෙනෙකුගෙන් යුත් පවුලකට මසකට ප්‍රමාණවත් වන ආහාර පාර්සල් 5,000 ක් WFP විසින් බෙදා හැර ඇති අතර තිරිඟු පිටි සහ ධාන්‍ය ආනයනය කිරීමට සැලසුම් කරමින් සිටින බව ඇය පැවසුවාය.

මේ අතර ලෝක සෞඛ්‍ය සංවිධානයේ ක්‍රිස්ටියන් ලින්ඩ්මියර් අනතුරු ඇඟවූයේ ලෙබනනයේ රෝහල් රෝගීන්ගෙන් පිරී ඉතිරී ගොස් ඇති බවයි.

ලෝක සෞඛ්‍ය සංවිධානය විසින් අත්‍යවශ්‍ය ඖෂධ සහ වෛද්‍ය සැපයුම් අඩංගු හදිසි ශල්‍ය සැපයුම් කට්ටල ලබා දී ඇති අතර, ක්ෂණික අවශ්‍යතා සපුරාලීම සඳහා සහ කෝවිඩ් -19 වසංගතයට ප්‍රතිචාර දැක්වීමේ අඛණ්ඩතාව සහතික කිරීම සඳහා ඩොලර් මිලියන 15ක් ඉල්ලා සිටී.

ලෙබනනයේ කොරෝන වෛරස් රෝගයේ වැඩිවීමක් දක්නට ලැබුණද ලෝක සෞඛ්‍ය සංවිධානය විසින් බේරූට් වෙත නැව්ගත කරන ලද මුහුණු ආවරණ සහ අත්වැසුම් බහාලුම් 17ක් පිපිරීමේදී මුළුමනින්ම විනාශ වී ඇති බව ලින්ඩ්මියර් මහතා පැවසීය.

ලෙබනනයේ රැකවරණය යටතේ සිටින මිලියන 1.5 ක සිරියානු සරණාගතයින්ට සහය දක්වන එක්සත් ජාතීන්ගේ සරණාගත ඒජන්සිය කියා සිටියේ අවශ්‍ය සියලු දෙනා සඳහා හදිසි නවාතැන් ද්‍රව්‍ය මුදා හරින බවයි.

ඇමරිකානු ඩොලර් මිලියන 15ක් වටිනා ආහාර හා ඖෂධ වහාම යැවීමට සැලසුම් කර ඇති බව එක්සත් ජනපදය අද (07) නිවේදනය කිරීමත් සමඟ බොහෝ රටවල් ලෙබනනයට උදව් කිරීමට ආධාර ලබා දී තිබේ.

බී.බී.සී. වාර්තාවක් ඇසුරිණි – සැකසුම – තීක්ෂණ වෙළෙන්එගොඩ

Recommended For You

About the Author: Editor