අභිනව කථානායක මහින්ද යාපාට අගමැති මහින්දගෙන් සුභාශිංසන

ශ්‍රී ලංකාවේ නව වන පාර්ලිමේන්තුවේ අභිනව කථානායකවරයා වශයෙන් තේරීපත් වූ මහින්ද යාපා අබේවර්ධන මහතාට අග්‍රාමාත්‍ය මහින්ද රාජපක්ෂ මහතා විසින් අද (20) දින සුභ පැතුම් එක් කළේය.

ඒ අද පෙරවරුවේ නව වෙනි පාර්ලිමේන්තුවේ මංගල සැසිවාරයට එක් වෙමිනි.

ජනාධිපති ගෝඨාභය රාජපක්ෂ මහතා ඇතුළු රජය වෙනුවෙන් සුභ පැතුම් එක් කරමින් අග්‍රාමාත්‍යවරයා කියා සිටියේ දකුණු පළාතෙන් බිහි වූ කතානායකවරයෙකු වශයෙන් මහින්ද යාපා අබේවර්ධන මහතා තේරීපත්වීම පිළිබඳව තමාට නිහතමානී ආඩම්බරයක් ඇති බවයි.

කැබිනට් අමාත්‍යවරයෙකු වශයෙන් දීර්ඝ කාලයක් කටයුතු කොට අත්දැකීම් සම්භාරයක් ලබා ඇති මහින්ද යාපා අබේවර්ධන මහතා ජ්‍යේෂ්ඨයෙකු ලෙස පාර්ලිමේන්තු සම්ප්‍රදාය පිළිබඳව නිවැරදි අවබෝධයක් ලබා ඇති අයෙකු බවද අග්‍රාමාත්‍යවරයා එහිදී ප්‍රකාශ කළේය.

1983 මැයි 18 වන දින පැවති හක්මන ආසනයේ, අතුරු මැතිවරණයෙන් පාර්ලිමේන්තුවට තේරී පත් වූ අභිනව කථානායක මහින්ද යාපා අබේවර්ධන මහතා අද පටන් රටේ තුන්වැනි පුරවැසියා බවට පත්වන බව ගරු අග්‍රාමාත්‍ය මහින්ද රාජපක්ෂ මහතා සිහිපත් කළේය.

අභිනව කථානායක මහින්ද යාපා අබේවර්ධන මහතාට පාර්ලිමේන්තුව තුළ අපක්ෂපාතීව හා ස්වාධීනව කටයුතු කිරීමට අවශ්‍ය ශක්තිය හා ධෛර්ය ලැබේවායි අග්‍රාමාත්‍ය මහින්ද රාජපක්ෂ මහතා එහිදී සුභාශිංසන එක් කළේය.

Recommended For You

About the Author: Editor