දිමුත් ඇතුළු 5ක් ජෛව ආරක්ෂිත බුබුළින් මුදා හරියි

සංචාරක එංගලන්ත පිලට එරෙහිව ගාල්ල ජාත්‍යන්තර ක්‍රීඩාංගණයේ පැවැති පළමු ටෙස්ට් තරගය සඳහා නම් කරන ලද ක්‍රීඩකයින් 22 කගෙන් සමන්විත සංචිතයෙන් දිමුත් කරුණාරත්න ඇතුළු ක්‍රීඩකයින් පස් දෙනෙකු ජෛව ආරක්ෂිත පරිසරයෙන් නිදහස් කර යැවීමට ශ්‍රී ලංකා ක්‍රිකට් තේරීම් කමිටුව පියවර ගෙන තිබේ.

දිමුත්ට අමතරව කුසල් මෙන්ඩිස්, මිනෝද් භානුක, ළහිරු කුමාර සහ නුවන් ප්‍රදීප් යන ක්‍රීඩකයින් හට තව දුරටත් කණ්ඩායම සමඟ රැඳී සිටිමින් කටයුතු කිරීමේ අවස්ථාව අහිමිවනු ඇත.

දකුණු අප්‍රිකාවට එරෙහිව වොන්ඩරස්හි පැවැති තරගයේ පන්දුවට පහර දෙමින් සිටියදී දිමුත් කරුණාරත්න මහපටැඟිල්ලේ ආබාධයකට මුහුණ දුන් අතර එය සුව අතට පත් නොවීම නිසා එංගලන්තයට එරෙහිව පැවැති පළමු ටෙස්ට් තරගයට ක්‍රීඩා කිරීමේ අවස්ථාව ඔහුට අහිමිවිය. එම තත්ත්වය මත කණ්ඩායම මෙහෙයවීමේ වගකීම දිනේෂ් චන්දිමාල්ට පැවැරිණි. කෙසේ වෙතත් දෙවැනි ටෙස්ට් තරගයටද දිමුත්ගේ දායකත්වය අහිමි වන බැවින් කණ්ඩායම මෙහෙයවීමේ වගකීම තවදුරටත් දිනේෂ් චන්දිමාල් වෙත පැවැරී තිබේ.

මෙම ක්‍රීඩකයින් ඉවත්ව යෑමත් සමඟ දෙවැනි ටෙස්ට් තරගය සඳහා වන ශ්‍රී ලංකා සංචිතය 17 දෙනෙකු දක්වා අඩු වී තිබේ. කෙසේ වෙතත් මුදා හරින ලද ක්‍රීඩකයින් පස් දෙනා වැඩි දුර පුහුණුව සඳහා ශ්‍රී ලංකා ක්‍රිකට් ආයතනය යටතේ පවතින ඉහළ කාර්යය සාධන මධ්‍යස්ථානය වෙත යොමු කෙරෙනු ඇත.

මුදා හරින ලද ක්‍රීඩකයින් 5 දෙනො අතරින් කුසල් මෙන්ඩිස් පමණක් එංගලන්ත හමුවේ කඩුලු 7 ක පරාජයක් අත් විඳි පළමු ටෙස්ට් තරගය සඳහා ක්‍රීඩා කළ අතර, මිනෝද් භානුක, අතිරේක ක්‍රීඩකයකු ලෙසින් එම තරගයේදී  පන්දු රැකීමේ කාර්යයේ නිරත විය.

දෙරට අතර පැවැත්වෙන දෙවැනි ටෙස්ට් තරගය ලබන 22 වැනි සිකුරාදා ගාල්ල ජාත්‍යන්තර ක්‍රීඩාංගණයේදී ආරම්භ වනු ඇත.

Text by – Sri Lanka Cricket

Recommended For You

About the Author: Editor