රජයේ ප්‍රතිපත්තියට පිටින් යන්න බෑ: ‘මාතලේ කන්න රැස්වීමේදී නිලධාරීන් අසරණ වෙයි‘

දෙවහුව ජලාශය යටතේ වගා කරන  කුඹුරු අක්කර 3000ක් මෙවර වී වගාවෙන් ඉවත් වීමට අනුරාධපුර සහ මාතලේ දිස්ත්‍රික්කයේ ගොවි සංවිධාන නියෝජිතයෝ අද (08) දින පැවති කන්න රැස්වීමේදී මාතලේ දිසාපතිවරයාට දැනුවත් කරමින් කන්න රැස්වීම් වර්ජනය කරමින් ඉවත්ව ගියහ.

මාතලේ   දිස්ත්‍රික්කයේ සහ අනුරාධපුර දිස්ත්‍රික් කෘෂිකර්ම, වාරිමාර්ග, ගොවිජන සේවා නිලධාරීන් මෙන්ම ප්‍රාදේශීය ලේකම වරුන්ගේ සහභාගිත්වයෙන් මාතලේ දිසාපති පී.කේ.ඩී. පෙරේරා මහතා ගේ ප්‍රධානත්වයෙන් මෙම රැස්වීම දේවහුව පුංචි දඹුල්ල රජ මහා විහාරයේ දී පැවැත්විණි.

ගොවි සංවිධාන 09ක ගොවි නියෝජිතයන් මෙන්ම නිලධාරීන් විහාරස්ථානයේ ධර්මශාලාවට පස්වරුවේ රැස්ව දේවහුව ජලාශය යටතේ ඉදිරි සැලසුම් කිරීම් ජලය නිකුත් කිරීම් ආදී කරුණු කාරණා පිළිබඳව තීන්දු තීරණ ලබා ගැනීම් ආරම්භ කෙරිණි. එහිදී ගොවි නියෝජිතයන් සියලු දෙනා රජයේ නිලධාරින් ගෙන් විමසා සිටියේ මෙවර වී වගාව සදහා රසායනික පොහොර සහ වල්නාශක කෘමිනාශක ආදී ලබා දෙන්නේ ද යන්න ය. පැමිණ සිටි රජයේ නිලධාරීන් සියලු දෙනාගේ මතය බවට පත් වූයේ රජය ගත් ප්‍රතිපත්ති තීන්දුව රාජ්‍ය නිලධාරීන් ලෙස වෙනස් කිරීමට තමන්ට හැකියාවක් නොමැති බවය.

මාතලේ දිස්ත්‍රික් ලේකම් පී. කේ.ඩී. පෙරේරා මහතාගේ තීන්දුව කුමක්දැයි ගොවීන් ප්‍රශ්න කරන්නට විය. එහිදී දිස්ත්‍රික් ලේකම්වරයා කියා සිටියේ කාබනික වගාව සඳහා රජය ලබා ගෙන ඇති ප්‍රතිපත්ති තීන්දුවට පිටතින් රජයේ නිලධාරීන් හැටියට ගමන් කිරීම්ට නොහැකි බවය. එම ප්‍රකාශය කිරීම්ත් සමඟ පැමිණ සිටි ගොවි නියෝජිතයන් සියලු දෙනා කන්න රැස්වීමේ නොසන්සුන්කාරී ලෙස හැසිරෙමින් නිලධාරී  කණ්ඩායම පමණක් එම රැස්වීම් ශාලාවේ තබා ඉන් පිටතට යන්නට වූහ.

ගොවි නියෝජිතයන් සියලු දෙනා එක හඬින් කියා සිටියේ මෙවර දේවහුව ව්‍යාපාරය යටතේ වගා කරන කුඹුරු අක්කර තුන් 3000  වී වගාකිරීමේ ඉවත්ව සිටින බවය.

රසායනික පොහොර සහ කෘමි නාශනාශක වල් නාශක ලබා දෙන්නේ නම් තමන් පසු දින සිට ම කුඹුරු වගා කිරීම සඳහා මැදිහත් වන බව ද ඔවුහු වැඩිදුරටත් පවසමින් කෑකෝ ගසමින් එම ස්ථානයෙන් පිටව යන්නට වූ අතර රාජ්‍ය නිලධාරීන් පමණක් රැස්වීම් ශාලාවේ හිස් පුටු ගොඩක් අතර තනි ව සිටියහ.

සටහන සහ ඡායාරූප – කාංචන කුමාර ආරියදාස – දඹුල්ල

Recommended For You

About the Author: Thusal

Leave a Reply

Your email address will not be published. Required fields are marked *