ශ්‍රමයට අභිමන් අගමැති බුහුමන් සමරු කලාපයට අගමැතිගෙන් සුභාශිංසන

ශ්‍රම අභිමන් අගමැති බුහුමන් සමරු කලාපයට අගමැති මහින්ද රාජපක්ෂ මහතා විසින් නිකුත් කළ සුබ පැතුම් පණිවිඩය සම්පූර්ණයෙන් පහත දැක්වේ.

සුවහසක් වැඩකරන ජනතාවගේ සුබසාධනය ඉහළ නංවමින් තෘප්තිමත් ශ්‍රී  ලාංකික ශ්‍රම බලකායක් වෙනුවෙන් “ශ්‍රම වාසනා අරමුදල”පුරෝගාමී මෙහෙවරක් ඉටුකරයි.

රටේ සංවර්ධනය උදෙසා සිය ශ්‍රමය කැපකරන කම්කරු ජනතාවගේ සුබසාධනය වෙනුවෙන් කම්කරු හා වෘත්තීය පුහුණු අමාත්‍යවරයාව සිටිය දී  මාගේ සංකල්පයක් අනුව බිහි වූ “ශ්‍රම වාසනා අරමුදල”මේ වනවිට බොහෝ දුරක් පැමිණ තිබේ.

කම්කරු ප්‍රජාව වෙනුවෙන් විශිෂ්ට සේවයක් ඉටුකළ වෘත්තීය සමිති නායකයින් සහ විශ්‍රාමික රාජ්‍ය නිලධාරීන් ඇගයීම සඳහා සම්මාන බුහුමන් දැක්වීම ඒ අතර අගය කළ යුතු කාර්යයකි.

වැඩකරන ජනතාවගේ සැබෑ වෘත්තීය අයිතිවාසිකම් දිනා දීමට බොහෝ  කම්කරු නායකයෝ ජීවිත කාලය පුරාවට කැපවෙති. එවැනි නායකයින් මෙන්ම කම්කරු ප්‍රජාවේ සිතුම් පැතුම් සහ අවශ්‍යතා හඳුනාගෙන ඔවුන් සමග ඉතා  සමීපව කටයුතු කරන රාජ්‍ය නිලධාරීන් ද නිසි ඇඟයීමකට ලක් කළ යුතුය. එය හුදෙක් කම්කරු සුබසාධනය සඳහා දිරිගැන්වීමකි.

රටේ ආර්ථිකයේ ගාමක බලවේගය වන කම්කරු ජනතාව විපතට පත්වූ විටෙක ඒ අයට යම්  සහනයක් සැළසීමට රජයේ මුදල් වියදම් කළ හැකි  ක්‍රමවේදයක් නොමැතිවීමෙන් මෙවැනි අරමුදලක අවශ්‍යතාව 1995 දී තදින් දැනුන හැටි අදටත් මාගේ මතකයේ රැදී තිබේ.

ඊට පිළියමක් ලෙස 1998 වසරේදී යථාර්ථයක් බවට පත්වූ  “ශ්‍රම වාසනා අරමුදල”අඛණ්ඩව  විසිතුන් වසරක් තිස්සේ කම්කරු ජනතාවට සහ කම්කරු පවුල්වලට රැකවරණයක් වීම අප ලැබූ ජයග්‍රහණයකි.

ශ්‍රී ලංකාවේ කම්කරු ප්‍රජාව වෙනුවෙන් විශිෂ්ට සේවයක් ඉටුකිරීම වෙනුවෙන්  “ශ්‍රමයට අභිමන් අගමැති බුහුමන් “ ලබන කම්කරු නායකයින් සහ රාජ්‍ය නිලධාරීන්ට මාගේ ප්‍රණාමය හිමි වේ. කම්කරු ජනතාවගේ සුබසාධනය සහ ඔවුන්ගේ ජීවන තත්ත්වය ඉහළ නංවන  “ශ්‍රම වාසනා අරමුදල” තව තවත්  ශක්තිමත් වේවා! යැයි ප්‍රාර්ථනා කරමි.

Recommended For You

About the Author: Thusal