‘ගංජා වැවුවොත් රටම ගොඩේ ගොඩ‘ – ඩයනා ගමගේ ආණ්ඩුවට පෙන්වා දෙයි

විදේශ විනිමය උපයන ව්‍යාපාරයක් බව පවසමින් ගංජා නීතිගත කර රාජ්‍ය අනුග්‍රහය මත වගා කරන ලෙස රජයට සහාය දක්වන සමගි ජන බලවේගය ජාතික ලැයිස්තු පාර්ලිමේන්තු මන්ත්‍රී ඩයනා ගමගේ අද (16) රජයට යෝජනා කළා.

චීනය සහ කෙන්යාව වැනි අනෙකුත් රටවල් තේ වගා කිරීම ආරම්භ කර වෙළඳපළ කොටසෙන් වැඩි කොටසක් අත්පත් කර ගෙන ඇති බැවින් තේ වාණිජ වගාවක් ලෙස තවදුරටත් වගා කළ නොහැකි බව ඇය පාර්ලිමේන්තුවේදී පැවසුවාය.

ශ්‍රී ලංකාවේ ගංජා වාණිජ වගාවක් ලෙස සැලකිය හැකි බවත් විදේශ විනිමය උපයා ගැනීම සඳහා ප්‍රධාන අපනයන භෝගයක් ලෙස භාවිත කළ හැකි බවත් පවසන ඇය අනෙකුත් රටවල් අපනයනය කිරීමෙන් විශාල ආදායමක් උපයන බව පැවසුවාය.

“තේ තවදුරටත් ශ්‍රී ලංකාවට වාණිජ වගාවක් නොවේ. ගංජා ශාකය අපට ස්වභාවධර්මයේත් දෙවියන්ගේත් ආශිර්වාදය ලැබී තිබෙනවා. එය වාණිජ වගාවක් ලෙස රාජ්‍ය අනුග්‍රහය ඇතිව වගා කළ යුතුයි. වසර දෙක තුනක් ඇතුළත ණය ගෙවා ගැනීමට විදේශ විනිමය උපයා ගත හැකියි. අපට ජාත්‍යන්තර මූල්‍ය අරමුදලෙන් හෝ වෙනත් රටකට මුදල් හිඟාකන්න අවශ්‍ය නැහැ,” ඇය වැඩිදුරටත් පැවසුවාය.

1800 ගණන්වල බ්‍රිතාන්‍යයන් විසින් ගංජා සම්බන්ධයෙන් ගෙන ආ ආඥාපනත රජය විසින් අහෝසි කළ යුතු බව පැවසූ මන්ත්‍රීවරිය ශ්‍රී ලංකාව තුළ ගංජා නීතිගත කිරීමේ නීති සම්මත කරන ලෙස අධිකරණ ඇමැතිවරයාගෙන් ඉල්ලා සිටියාය.

යුරෝපීය ආයෝජන බැංකුවේ (EIB) අනාවැකිවලට අනුව ඉදිරි දශකය තුළ ගෝලීය ගංජා වෙළෙඳපොළ කොටස 1000% කින් ඉහළ යනු ඇති බවත් එය 2027 වන විට ඩොලර් බිලියන 140 ක් වනු ඇති බවත් ඇය පැවසුවාය

Recommended For You

About the Author: Thusal

Leave a Reply

Your email address will not be published. Required fields are marked *