හම්බන්තොට ලොජිස්ටික් ජාත්‍යන්තර සේවා සැපයුම් මධ්‍යස්ථානයේ ඉදිකිරීම් ඇරඹෙයි

  • හම්බන්තොට වරායේ ඉදිකිරීම් අග්‍රාමාත්‍යතුමාගේ නිරීක්ෂණයට
  • ලක්ෂ 5ක වාර්තාගත වාහන හැසිරවීම සංකේතවත් කරයි
  • ඩොලර් මිලියන 600ක ටයර් කර්මාන්ත ශාලාවකුත් ඉදිවෙයි
  • ලුණුගම්වෙහෙර “බලාපොරොත්තුවේ ගම්මානය”ලෙස සංවර්ධනයට

“මාගම් රුහුණුපුර මහින්ද රාජපක්ෂ වරාය’’ පරිශ්‍රයේ  ප්‍රථම බන්ධිත ගබඩා සංකීර්ණයවන හම්බන්තොට ලොජිස්ටික්ස් ජාත්‍යන්තර සේවා සැපයුම් මධ්‍යස්ථානයේ ඉදිකිරීම් කටයුතු අග්‍රාමාත්‍ය මහින්ද රාජපක්ෂ මහතාගේ ප්‍රධානත්වයෙන් අද (14) දින ආරම්භ විය.

හෙක්ටයාර් එකක භූමි ප්‍රමාණයක් දක්වා විහිදෙන මෙම ගබඩා සංකීර්ණයේ ඉදිකිරීම් සංකේතවත් කරමින් අග්‍රාමාත්‍යවරයා විසින් සමරු ඵලකය නිරාවරණය කරනු ලැබීය.

හම්බන්තොට ජාත්‍යන්තර වරාය සමූහයෙහි ප්‍රධාන විධායක නිලධාරී ජොන්සන් ලියූ මහතාගේ ආරාධනයෙන් මෙම අවස්ථාවට සහභාගිවූ අග්‍රාමාත්‍ය මහින්ද රාජපක්ෂ මහතා මෙරට චීන තානාපති කුයි ශෙන්හොං මහතා ඇතුළු පිරිස සමඟ වරාය පරිශ්‍රයේ  නිරීක්ෂණ චාරිකාවකටද  එක් වූහ.

හම්බන්තොට ජාත්‍යන්තර වරාය පරිශ්‍රයේ පිහිටි  ප්‍රතිනැව්ගත කෙ‍ෙරන වාහන  හසුරුවන  මෙහෙයුම් අංශය  (Ro Ro operations) වෙත ගිය අග්‍රාමාත්‍යවරයා වාහන ප්‍රතිනැව්ගත කිරීමේ කටයුතු සිදුවන ආකාරය නිරීක්ෂණය කළේය.

මෙම වසර තුළ පමණක් වාහන ලක්ෂ පහක  ප්‍රමාණයක් එම අංශයෙන් හසුරුවා ඇති බව හම්බන්තොට ජාත්‍යන්තර වරාය සමූහයෙහි ප්‍රධාන විධායක නිලධාරී ජොන්සන් ලියූ මහතා අග්‍රාමාත්‍යවරයාට පෙන්වා දුන්නේය.

වරාය විසින් මෙතෙක් හසුරුවා ඇති ඉහළම වාහන ප්‍රමාණය මෙය වන අතර අග්‍රාමාත්‍යතුමා සහ චීන තානාපතිතුමා එක්ව එම අංගනයේ දී  පීත්තපටියක් කපමින් එය සංකේතවත් කළේය.

ඉන්දියාවේ චෙන්නායි, මුන්ද්‍රා, එනෝර්, දකුණු කොරියාවේ ගුන්සාන්, පියොංටෙක්, සහ ජපානයේ  ඔසාකා, කොබේ සහ නගෝයා යන වරායන්වලින් ප්‍රතිනැව්ගත කිරීම සඳහා හම්බන්තොට වරායට වාහන රැගෙන එන අතර, දකුණු අප්‍රිකාවේ ඩර්බන්, මෙක්සිකොවේ වෙරක්‍රස්, අමෙරිකාවේ සැන් ඇන්ටෝනියෝ, නෙදර්ලන්තයේ රොටර්ඩෑම් සහ ප්‍රංශයේ ලේ හැවේරේ යන වරායන් වෙත මෙම වාහන ප්‍රතිනැව්ගත කරයි.

වරාය පරිශ්‍රයේ පිහිටි කර්මාන්ත කලාපයේ ඉදිකෙරන  ෂෙන්ෂෙන් ෂින්ජි සමූහයට (Shenzhen Xinji Group) අයත් “පිරිනිමි“ (Plug and Play), “කලාපය තුළ කලාපයක්’’ (Park in Park) සංකල්පයෙන් ක්‍රියාත්මක ඉලෙක්ට්‍රොනික් උපාංග නිෂ්පාදන කර්මාන්ත කලාපය  සහ සිලෝන් ටයර් නිෂ්පාදන පුද්ගලික සමාගම විසින් ඉදිකරන ටයර් නිෂ්පාදන කර්මාන්ත ශාලා පරිශ්‍රය අග්‍රාමාත්‍යවරයාගේ විශේෂ අවධානයට ලක්විය.

ටයර් කර්මාන්ත ශාලාවේ නිෂ්පාදන කටයුතු සඳහා අමුද්‍රව්‍ය මෙන්ම පිරිස් බලයද සැපයෙන්නේ දේශීය වශයෙනි. හෙක්ටයාර් 55.8ක් පුරා විහිදෙන මෙම ටයර් නිෂ්පාදන කර්මාන්ත ශාලාව ඉදිකිරීම සඳහා අදියර දෙකකදී කරනු ලබන ආයෝජනය අමෙරිකානු ඩොලර් මිලියන 600කි.

හම්බන්තොට වරාය විසින් මේවන විට අත්පත් කරගෙන ඇති ප්‍රගතිය සම්බන්ධයෙන් සහ ඉදිරි සංවර්ධන වැඩ පිළිවෙල ගැන මෙහිදී හම්බන්තොට ජාත්‍යන්තර වරාය සමූහයෙහි ප්‍රධාන විධායක නිලධාරී ජොන්සන් ලියූ මහතා විසින් අග්‍රාමාත්‍යවරයාව දැනුවත් කරනු ලැබීය. 

හම්බන්තොට ජාත්‍යන්තර වරාය සමූහය විසින් ලුණුගම්වෙහෙර ගම්මානය “බලාපොරොත්තුවේ ගම්මානය’’ ලෙස  සංවර්ධනය කිරීමේ ව්‍යාපෘතියට අදාළ සන්නස් පත්‍රය අමාත්‍ය චමල් රාජපක්ෂ මහතා සහ හම්බන්තොට ජාත්‍යන්තර වරාය සමූහයෙහි ප්‍රධාන විධායක නිලධාරී ජොන්සන් ලියූ මහතා අතර හුවමාරු කරගැනීම ද මෙම නිරීක්ෂණ චාරිකාවට සමඟාමීව සිදුවිය.

Recommended For You

About the Author: Thusal