‘බජාජ් ඔටෝ’ නිර්මාතෘ ‘රාහුල් බජාජ් මිය යයි‘

ලොව විශාලතම ත්‍රිරෝද රථ නිෂ්පාදකයා වන ‘බජාජ් ඔටෝ’ නාමය ඉන්දියානුවන්ට පමණක් නොව මුළු ලොවටම හදුන්වා දුන් බජාජ් සමූහ ව්‍යාපාරයේ ආරම්භකයා මෙන්ම එහි හිටපු සභාපතිවරයා ද වූ රාහුල් බජාජ් පූනේ නුවර දී අභාවප්‍රාප්ත විය. ඔහුගේ වයස අවුරුදු 83 ක් බව ඉන්දීය මාධ්‍ය වාර්තා කරයි.

ඉන්දීය කර්මාන්ත ක්‍ෂේත්‍රයේ ප්‍රවීණයකු ලෙස ද සැලකෙන මොහු බජාජ් සමූහය මෝටර් රථ කර්මාන්තයේ පමණක් නොව රක්ෂණ, ආයෝජන, පාරිභෝගික මූල්‍ය, ගෘහ උපකරණ, විදුලි පහන්, සුළං බලශක්ති, වානේ සහ සංචාරක ක්‍ෂේත්‍ර වෙත පුළුල් කිරීමට සමත් විය.

බජාජ් ස්කූටරය මධ්‍යම පාන්තික ඉන්දීය පවුල්වල අපේක්ෂා සහගත සංකේතයක් වූ අතර, බජාජ් ත්‍රිරෝද රථය ලොව විශාලතම නිෂ්පාදකයා බවට පත්වූයේ වාර්ෂිකව හත්ලක්ෂ අසූ දහසකට වඩා වැඩි ත්‍රිරෝද රථ ගණනක් අලෙවි කරමින් යැයි ඉන්දීය මාධ්‍ය වාර්තා සිහිපත් කරයි.

2005 වසරේදී රාහුල් බජාජ්  සිය සමාගම් සමූහයේ කළමනාකාරීත්වය සිය පුත්‍රයා වන රජීව් බජාජ් වෙත පැවරූ අතර, රජිව් දැන් එහි කළමනාකාර අධ්‍යක්ෂවරයා ලෙස කටයුතු කරමින් සිටී. රාහුල් බජාජ්ගේ අභාවය පිළිබඳව ඉන්දීය අග්‍රාමාත්‍ය නරේන්ද්‍ර මෝදි සහ ජනාධිපති රාම්නාත් කෝවින්ද් ද ට්විටර් පණිවුඩ හරහා ශෝකය පළ කර තිබේ.

(එන්.ඩී.ටීවී)

Recommended For You

About the Author: Thusal